*Bhabhi Ka Fitna (Sister-in-law's Temptation)*
*Khama Bakaf Muhammad Aadil Arriyavi (Pen in Hand Muhammad Aadil Arriyavi)*
________________________________
Aaj ke purfitan daur mein jahan behayai bepardagi aur najayaz talluqaat urooj par hain wahin ek khatarnak fitna jo khamoshi ke saath gharon ko tabah kar raha hai woh bhabhi ka fitna hai. Bahut saare naujawan khusoosan woh ladke jin ki abhi shadi nahin hui apni bhabhi ke saath zaroorat se zyada betakalluf ho jate hain. Ibtida hansi mazaaq mobile par guftagu aur chhoti chhoti baton se hoti hai lekin aahista aahista yahi talluq gunah badnigahi zina aur khandan ki tabahi tak pahunch jata hai.
Bahut se naujawan yeh samajhte hain ki bhabhi to apni hi ghar ki aurat hai is se hansi mazaaq karna ghanton phone par baat karna dil lagi karna ya tanhai mein baithna koi gunah nahin halanke haqeeqat yeh hai ki bhabhi bhi ghair mehram hai. Shariat ne jis tarah dusre ghair mehram auraton se parda aur ehtiyat ka hukum diya hai isi tarah bhabhi se bhi hudood qaim rakhne ka hukum diya hai. Lekin afsos ke aaj log is mamla mein bahut laparwah ho chuke hain.
Aksar dekha jata hai ke chhota bhai apni bhabhi ke saath had se zyada dilchaspi lene lagta hai. Kabhi mazah ke naam par kabhi khidmat ke naam par aur kabhi apnaiyat ke bahane dilon mein shaitan jagah bana leta hai. Mobile par lambi lambi guftagu raat raat bhar chatting ek dusre ki tareefen tanhai mein mulaqaten yeh sab shaitan ke woh raste hain jo aakhirkar insan ko tabahi ki taraf le jate hain.
Main ne khud ek shakhs ka waqia suna ke jab us ke bade bhai ki shadi hui to chhota bhai apni bhabhi ke saath bahut zyada hansi mazaaq karne laga. Shuru mein ghar walon ne ise mamooli baat samjha lekin aahista aahista donon ke darmiyan najayaz talluqaat qaim ho gaye. Naubat yahan tak pahunchi ke ek din woh apni hi bhabhi ko le kar ghar se farar ho gaya. Is ek galti ne pure khandan ki izzat khaak mein mila di. Walidain ruswa ho gaye bhai ki zindagi barbaad ho gai aur khandan mein nafrat o dushmani paida ho gai.
Isi tarah ek aur shakhs ne apna dardnak waqia sunaya ke woh apni bhabhi se baten karte karte is qadar qareeb ho gaya ke kai martaba un donon ko ghar walon ne naamunasib halat mein dekha magar khandan ki izzat bachane ke liye khamoshi ikhtiyar ki gai. Lekin gunah kab tak chhupta? Ek din shohar ne khud apni aankhon se yeh sab dekh liya. Isi waqt us ne apni biwi ko talaq de di aur donon ko ghar se nikal diya. Baad mein woh najayaz talluq bhi zyada din na chal saka donon ke darmiyan shadeed ladaiyan shuru ho gayin mamla court kachahri tak pahunch gaya aur donon khandan tabahi o barbadi ka shikar ho gaye.
Yaad rakhen shaitan kabhi insan ko ek dam bade gunah ki taraf nahin le jata balki aahista aahista qadam badhwata hai. Pahle hansi mazaaq phir phone par baten phir tanhai phir najayaz talluqaat aur aakhir mein zina ya ghar se bhag jana. Yahi wajah hai ke Islam ne ibtida hi mein ghair mehram auraton se betakallufi se mana kiya hai taake insan bade gunahon se mehfooz rahe.
Aaj zaroorat is baat ki hai ke naujawan Allah Taala se daren apni nazron ki hifazat karen bhabhi ko haqeeqi behan ki tarah izzat den na ke khwahishat ka zariya banayen. Walidain ko bhi chahiye ke woh apne bachon ki nigrani karen gharon mein parda aur shari hudood ka mahol qaim karen aur waqt par shadi ka intezam karen taake naujawan gunahon se bach saken.
Khudara apne gharon ko jahannam banne se bachayen. Yaad rakhen ke chand lamhon ki najayaz lazzat puri zindagi ki ruswai ban sakti hai. Allah Rabb ul Izzat hum sab ko har qism ke fitnon se mehfooz farmaye aur pakeeza zindagi guzarne ki taufeeq ata farmaye. Aameen Ya Rabb ul Aalameen.