Waqt Kia hai... Waqt aik mauqa hai, mohlat hai
Waqt woh hai jise ganwana aasaan hai
Waqt woh hai jiske guzarne se insaan hairaan hai
Waqt woh hai jo har aik ka mehman hai
Aur waqt aik ibrat ka nishaan hai
Har din naya din hota hai insaan iske andar jo aamaal karle woh mehfooz ho jata hai aur jo haasil karle woh mehfooz ho jata hai phir yeh din toh kia iska aik lamha bhi ta qayamat muyassar nahi aane wala
Har din har pal har ghari qeemti jawahiraat se kahin ziada qeemti aur qabil-e-qadar hai
Waqt barf ki tarah hai balkeh is se bhi ziada nazaakat liye huwe
Barf toh pighal kar pani ban jata hai makhsoos temperature par
Magar waqt is tarah pighalta hai ke ehsaas bhi nahi ho pata aur na hum ise rokne ki taaqat rakhte hain na pakarne par qudrat
Aur isi tarah humari umer waqt ke har second ke saath guzarti chali jati hai
Magar qudrat ka insaaf toh dekhen ke waqt ke bare mein kaisi barabari rakhi
Ghareeb, ameer, zaeef, nadaar, naujawan, bachche,
Mard, aurat, aqalmand, nadan, sabko yaksaan mohlat mili
Har aik ko chobis ghante masawi taur par mile hain
Sirf zaroorat is baat ki hai ke hum ise behtar tareeqe se istemaal kar saken
Agar yunhi kaam ko bila wajah multawi karte rahe kabhi fazool majalis mein baith kar, kabhi baatein karke, kabhi nafs ke haathon
Toh yaad rahe ke dekhte hi dekhte hum qabar mein honge aur jis adam-e-fursat ke shikwe dunya mein karte the woh bhi maujood hogi
Ba wajood yeh ke kaam karne ka mauqa, aakhirat banane ka mauqa yeh mohlat yeh neymat aap se juda ho chuki hogi
Isliye khudara waqt rehte huwe waqt ki qadar karlen
Allah humen waqt ko apni razamandi wale kamon mein istemaal karne ki toufeeq marhamat farmaye...Aameen Ya Rabbul Aalameen