Day of Reward After Worship

سعدیہ فاطمہ عبدالخالق
ناندیڑ مہاراشٹر

8485884176

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
*Ibadat Ke Baad Inaam Ka Din*

Tamaam Tareefein Allah Ke Liye Hain Aur Saari Ne'matein Usi Ki Di Hui Hain,
Allah Ta'ala Ka Laakh Laakh Shukr Hai Ke Usne Humein Ashraf Ul Makhluqaat Mein Rakha Hai Aur Aap Sallallahu Alaihi Wasallam Ke Ummati Mein Rakha Hai,
Ramzan Ke Roze Poore Hote Hi Hum Inaam E Ilahi Ke Din Mein Daakhil Hogaye, Baargah E Ilahi Mein Sarsajood Hain Ke Yeh Din Dekhne Mila Hai, Maah E Ramzan Rooh Ki Mazbooti Aur Zaahir O Baatin Ki Safai Ka Naam, Yeh Nekiyon Ki Tijaarat, Tauba O Istighfaar, Hamdardi, Sabr O Shukr, Isaar O Qurbani Aur Quran Fehmi Ka Mahina, Anwaar O Barkaat Ka Nazool, Rehmaton Aur Barkaton Ke Sametne Ka Mauqa, Gunahon Se Maghfirat Aur Azaab E Jahannam Se Nijaat Ka Parwana, In Tamaam Faiz O Barkaat Ko Samet Te Hue Hum Is Din Tak Pahunch Gaye Hain,
Yeh Maah E Khair Toh, Ek Ghanimat Hai, Jis Ka Har Din Ahem, Har Lamha Qeemti Aur Har Pal Nekiyon Ki Bahaar Hai, Be Shumaar Inayatein, Fazilatein, Hidayatein, Azmatein Wa Be Inteha Rehmatein, Barkatein, Kamiyabiyan Aur Kamraaniyan Hain,
Momineen Ke Liye Do Hi Eidein Hain, Ek Eid Ul Fitr Aur Ek Eid Ul Azha, Quran E Majeed Ramzan Ke Rozon Se Mutalliq Do Maslihaten Bayan Karta Hai, Ek Yeh Ke Musalmanon Mein Taqwa Paida Ho, (Lallakum Tattaqoon) Aur Doosre Is Ki Is Nemat Ka Shukr Ada Karna Chahiye Jo Usne Maah E Mubarak Mein Naazil Kiya,
(Litukabbirullah Ala Ma Hadakum Wa La'allakum Tashkuroon)
Allah Ka Hukm Ada Karke Ek Musalman Mahina Bhar Ki Mushaqqat Utha Kar Na Sirf Roza Rakhta Hai Balke Allah Ki Ita'at Karte Hue Apne Roze Mein Mukammal Imaan O Ehtisaab Ki Kaifiyat Paida Karne Ki Koshish Karta Hai Taake Woh Is Roze Se Woh Ajr Haasil Kar Sake Jis Ka Zikr Kiya Gaya Aur Jis Ka Woh Haq Daar Bhi Hoga

Youm E Eid Maah E Siyaam Ki Takmeel Par Allah Ta'ala Se Inaamaat Paane Ka Din Hai Toh Is Se Ziyada Khushi Wa Musarrat Ka Mauqa Kya Ho Sakta, Yahi Wajeh Hai Ke Ummat E Muslima Mein Is Din Ko Ek Khaas Maqaam Aur Ahmiyat Haasil Hai, Ulama E Kiram Ne Likha Hai Ke Eid Lafz ,, Aud ,, Se Mushtaq Hai, Jis Ke Ma'ani ,, Lautna ,, Ke Hai, Yani Eid Har Saal Lautti Hai, Is Ke Laut Kar Aane Ki Khwahish Ki Jaati Hai, Aur Fitr Ke Ma'ani ,, Roza Todne Ya Khatam Karne ,, Ke Hain, Chunke Eid Ul Fitr Ke Roz, Rozon Ka Silsila Khatam Hota Hai, Aur Is Roz Allah Ta'ala Bandon Ko Ibadaat E Ramzan Ka Sawaab Ataa Farmate Hain, Toh Isi Munasibat Se Ise ,, Eid Ul Fitr ,, Qarar Diya Gaya Hai,
Ahadees E Mubaraka Mein Shab E Eid Aur Youm E Eid Ki Bahut Fazilat Bayan Farmayi Gayi Hai, Hazrat Abdullah Bin Abbas Raz Se Riwayat Hai Ke Nabi Kareem Sallallahu Alaihi Wasallam Ne Irshad Farmaya Jab Eid Ul Fitr Ki Raat Hoti Hai Toh Ise ,, Lailatul Jaaiza ,, Yani ,, Inaam Ki Raat ,, Ke Naam Se Pukara Jata Hai, Aur Jab Subah Eid Hoti Hai, Haq Ta'ala Jalla Shanahu Farishton Ko Tamaam Bastiyon Mein Bhejte Hain Aur Woh Raston Ke Konon Par Khade Ho Jaate Hain Aur Aisi Aawaz Se Jise Jinnaat Aur Insanon Ke Siwa Har Makhlooq Sunti Hai, Pukarte Hain Ke ,, Aye Ummat E Muhammadiya Sallallahu Alaihi Wasallam Is Kareem Rab Ki Baargah E Karam Mein Chalo Jo Bahut Ziyada Ataa Farmane Wala Hai, Jab Log Eid Gah Ke Taraf Nikalte Hain Toh Allah Rabb Ul Izzat Farishton Se Farmata Hai Ke ,, Is Mazdoor Ka Kya Badla Hai Jo Apna Kaam Poora Kar Chuka Ho, Woh Arz Karte Hain Ke ,, Aye Hamare Mabood Is Ka Badla Yahi Hai Ke Is Ki Mazdoori Aur Ujrat Poori Poori Ataa Kar Di Jaye,, Toh Allah Ta'ala Farmate Hain Ke ,, Aye Farishton Tumhein Gawah Banata Hun Ke Mein Ne Inhein Ramzan Ke Rozon Aur Tarawih Ke Badle Mein Apni Raza Aur Maghfirat Ataa Farma Di,, Aur Phir Bandon Se Irshad Hota Hai Ke ,, Aye Mere Bandon Mujh Se Maango, Meri Izzat O Jalaal Aur Bulandi Ki Qasam, Aaj Ke Din Aakhirat Ke Bare Mein Jo Sawal Karoge Ataa Karunga, Duniya Ke Bare Mein Jo Sawal Karoge Us Mein Tumhari Maslihat Par Nazar Karunga, Mere Azz O Jalaal Ki Qasam, Mein Tumhein Mujrimon Aur Kafiron Ke Samne Ruswa Na Karunga, Mein Tum Se Raazi Ho Gaya,, (At Targheeb Wat Tarheeb) ۔
Bila Shubha Woh Afraad Nihayat Khush Qismat Hain Ke Jinhon Ne Maah E Siyaam Paya Aur Apne Auqaat Ko Ibadaat Mein Munawwar Rakha, Poore Maah Taqwa Ki Rawish Ikhtiyar Kiye Rakhi, Aur Baargah E Rabb Ul Izzat Mein Maghfirat Ke Liye Daaman Phailaye Rakha Yeh Eid Aise Hi Khush Bakht Afraad Ke Liye Hai Aur Ab Inhein Mazdoori Milne Ka Waqt Hai Ta Hum Sahaba E Kiram Aur Buzurgaan E Deen Apni Ibadaat Par Utraane Ke Bajaye, Allah Ta'ala Se Qubooliyat Ki Dua Kiya Karte The, Hazrat Ali Raz Ne Eid Ki Mubarakbaad Dene Ke Liye Aane Walon Se Farmaya ,, Eid Toh Un Ki Hai Jo Azaab E Aakhirat Aur Marne Ke Baad Ki Saza Se Nijaat Pa Chuke Hain, Isi Tarah Ek Dafa Hazrat Umar Bin Khattab Ke Daur E Khilafat Mein Log Eid Ke Roz Aap Raz Ke Paas Aaye Toh Dekha Ke Woh Ghar Ka Darwaza Band Kiye Zaar O Qataar Ro Rahe Hain, Logon Ne Arz Kiya, ,, Ameer Ul Momineen Aaj Toh Eid Ka Din Hai Aur Aap Raz Ro Rahe Hain, Hazrat Umar Raz Ne Jawab Diya, Logon Yeh Eid Ka Din Bhi Hai Aur Wa'eed Ka Din Bhi, Aaj Jis Ke Namaz Roze Aur Deegar Ibadaat Qubool Ho Gayin, Bila Shubha Aaj Us Ki Eid Hai Aur Jis Ki Ibadaat Qubool Nahi Huin, Us Ke Liye Wa'eed Ka Din Hai, Is Khauf Se Ro Raha Hun Ke Nahi Maloom Meri Ibadaat Qubool Hui Ya Inhein Radd Kar Diya Gaya,
Eid Apne Alawa Doosre Ko Bhi Khushiyon Mein Shaamil Karne Ka Naam Hai, Sila Rehmi Ka Muamla Karne Ka Naam Hai, Islam Ek Mukammal Nizaam E Hayaat Hai, Allah Ke Banaye Gaye Qawaneen Hamesha Insaaf Aur Husn E Sulook Karne Ka Muamla Karne Ki Targheeb Dilate Hain Eid Se Pehle Sadqa E Fitr Ada Karte Hain, Naye Kapde, Umda Khanon Ka Ehtemaam Karte Hain, Hamare Atraaf Mein Aise Kayi Ghurba Wa Masakeen Honge Jin Ke Paas Khane Ka Intezaam Na Hua Ho, Aise Afraad Ko Talaash Kar Ke Un Ke Bhi Khane, Kapde, Aur Deegar Zarooriyaat Ka Khayal Rakhte Hue Eid Manana Hi Darasal Eid Hai,
Is Eid Par Khaas Yeh Dhyan Rakhein Ke Ahl E Imaan Ka Imani Bunyaadon Par Ek Doosre Se Jo Rishta Hai Woh Nihayat Gehra Aur Be Hadd Mazboot Hai Agar Dekha Jaye Toh Yeh Rishta Khooni Rishte Se Bhi Ziyada Ahmiyat Ka Haamil Hai, Yeh Hamara Imani Rishta Hai Jo Kalma Ki Bunyaad Par Banta Hai Aur Yeh Baat Wazeh Hai Ke Kalma Har Cheez Se Buland Wa Baala Hai Aur Is Ki Qadr O Manzilat Duniya Wa Ma Fiha Se Bhi Badh Kar Hai Yeh Rishta Hamara Palestine Ke Saath Hai Jo Kabhi Na Tootne Wala Hai,
Ahl E Ghaza Mein Bachche, Budhe, Naujawan Aur Auratein Sab Ke Sab Badi Himmat Wa Jura'at Ke Saath Panja Aazmai Kar Rahe Hain, Aur Azm O Jura'at Ki Deewar Ban Kar Zaalim Ke Samne Khade Hain, Woh Kisi Aur Se Madad Talab Karne Ke Bajaye Apne Allah Ke Saath Mud Muqabil Ka Muqabla Kar Rahe Hain Aur Yeh Jaam E Shahadat Peene Ke Liye Be Chain Hain, Bait Ul Muqaddas Se Rishta Rakhne Walon Ki Shahadat Ko Madde Nazar Rakhein, Islam Ke Liye Shahadat Paane Walon Ko Madde Nazar Rakhein, Jahan Be Qasoor Musalman Pareshan Haal Hain, Un Ko Madde Nazar Rakh Kar Eid Manayein,
Isi Liye Hum, Maujooda Halaat Ko Dekhte Hue Islam Ke Liye Shahadat Paane Walon Ko Yaad Rakh Kar Bahut Hi Saadgi Se Eid Manayein, Apne Bachchon Ko Is Baat Ki Targheeb Dein Ke Palestine Mein Kitne Be Aasra Zulm Raseeda Bachche Hain, Jo Dana Pani Ke Liye Muhtaaj Hain Un Ke Saron Se Chhat Cheen Li Gayi, Ambiya E Kiram Ka Madfan, Hamara Qibla E Awwal Ko Yaad Karte Hue, Eid Ko Saadgi Se Manate Hue Allah Ka Shukr Ada Karein,
Allah Tamaam Momineen Ko Eid Ul Fitr Ka Sahi Haq Ada Karne Wala Banaye, Allah Hamare Ilm O Amal Ko Qubool Farmaye Aur Allah Hum Sab Se Raazi Ho Jaye,
Aameen