Poora hafta aik aik pal gin kar guzara tha. Nazrein har aahat par darwaze ki taraf uthtin ke shayad koi mojza ho jaye, shayad Baba ka taboot hi pahunch jaye, shayad aik baar un ka deedar naseeb ho jaye. Eid ki woh tamam tayyariyan, woh silai kiye hue kapre, woh matching ki churiyan aur jootiyan... sab aik dhair ki soorat kamre ke kone mein pari thin. Jo cheezein kal tak meri zindagi ka sab se bara junoon thin, aaj woh mujhe kaat khane ko daur rahi thin.
Phir Eid ki subah hui... wohi din jis ke liye Baba ne woh "Eidi" bheji thi jo meri kul kainat thi.
Magar Eid ki namaz ke sath hi woh khabar aayi jis ne mera raha saha hosla bhi tor diya. Phone ki woh ghanti mere waqar ki maut ki khabar layi: "Beti! Halaat sazgar nahin, Baba ki tadfeen wahin pardes ki mitti mein kar di gayi hai".
Aik pal mein sab kuch khatam ho gaya. Woh kapre jinhen pehnne ke liye mein be qarar thi, ab kafan se bhi ziyada safaid lag rahe the. Woh jewelry, woh purse, woh khushiyan... sab is aik khabar ke sath hi dafan ho gain. Mera ghuroor, mera maan, mera woh baap jo saat samandar paar baith kar bhi meri har zaroorat ka khayal rakhta tha, aaj wahin ki khamosh mitti ka hissa ban gaya.
Log Eid milne aa rahe the, aur mein is Eidi ki raqam ko dekh rahi thi jo ab kaghaz ka aik be jaan tukra ban chuki thi. Yeh woh raqam thi jo ab hamesha ke liye rafaqat chor gayi thi. Eid to aayi, magar mere liye yeh Eid nahin, mere baap ki ghayibana tadfeen ka din tha. Meri zindagi, mere naaz aur mere nakhron ki tadfeen ka din tha.
Aaj na jane kitne gharon mein Eid ki khushiyan hongi, magar mere ghar ki raunaq to hamesha ke liye pardes ki nazar ho gayi.
Ab har Eid par jab log apne piyaron se milen ge, mein is mitti ko yaad karoon gi jahan mera "Aasman" dafan hai, aur jis ka aakhri deedar bhi mujhe naseeb na ho saka
tha۔
ارْحَمْهُمَا كَمَا رَبَّيَانِي صَغِيرًا
Az qalam: Za-Sheikh