Dars-e-Hadith for the Public and Scholars Part (1)

Hazrat Umar bin Khattab (Razi Allahu Ta'ala Anhu) se rivayat hai woh kehte hain ke Rasool Allah (Sallallahu Alaihi Wasallam) ne farmaya

Amaal ka daar o madaar niyyaton par hai aur har shakhs ko wohi milega jis ki usne niyyat ki. Pas jis ki hijrat Allah aur uske Rasool ki taraf ho toh uski hijrat Allah aur uske Rasool hi ki taraf hai aur jis ki hijrat duniya kamane ke liye ho jise woh haasil karna chahta ho ya kisi aurat se nikah karne ke liye ho toh uski hijrat usi cheez ki taraf shumaar hogi jis ki taraf usne hijrat ki.

Deen mein sab se pehle jis cheez ko durust kiya jaata hai woh niyyat hai. Hum namaz padhte hain, roza rakhte hain, sadqa dete hain, ilm seekhte hain magar yeh sab kuch agar Allah ke liye na ho toh sirf ek aadat ban kar reh jaata hai. Rasool Allah (Sallallahu Alaihi Wasallam) ne humein shuru hi mein yeh usool samjha diya ke Allah ke nazdeek amal ki qadar uski niyyat se hoti hai miqdaar aur kasrat se nahi.

Ek hi amal hai magar ek shakhs ke liye woh jannat ka zeena ban jaata hai aur dusre ke liye mehaz thakan. Farq sirf itna hai ke ek ne Allah ko saamne rakha aur dusre ne logon ko isi liye buzurgan-e-deen farmate hain ke niyyat woh taraazu hai jis par amal ka wazan kiya jaata hai.

Agar niyyat durust ho jaaye toh aam sa kaam bhi ibaadat ban jaata hai aur agar niyyat kharaab ho jaaye toh badi ibaadat bhi bejaan rehti hai.

 Ulema wa Talaba-e-Ilm ke Liye

Yeh hadith ummat ke nazdeek naseehat ke saath saath usool-e-deen bhi hai isi liye Aimma-e-Mujtahideen ne iski ghair mamooli ahmiyat bayan ki hai...

Imam Abu Hanifa (Alaihir Rahma) ne ise Rub'ul Ilm qaraar diya. Imam Shafa'i (Alaihir Rahma) ne Nisf'ul Ilm kaha aur Imam Ahmad bin Hanbal (Alaihir Rahma) ke nazdeek yeh hadith Thulth'ul Ilm ke darje par faiz hai kyunke niyyat ibaadaat, muaamlaat aur akhlaaq teeno ki buniyaad hai.

Is hadith ka shaan-e-wurood Saeed bin Mansoor aur Mu'jam Kabir mein Tabrani ne naqal kiya hai ke ek sahabi ne ek aurat ko nikah ka paigham bheja. Us aurat ne shart rakhi ke agar nikah karna hai toh Madina hijrat karo us sahabi ne hijrat ki magar maqsad nikah tha. Us aurat ka naam Qila tha jo Umm-e-Qais se mashhoor thi isi nisbat se woh sahabi Muhajir Umm-e-Qais kehlaaye...

Imam Ghazali (Rehmatullah Alaih) ne niyyat ke aitbaar se aamaal ki nihayat jaame taqseem ki hai

1️⃣Ma'siyat

Aise aamaal jin mein niyyat se koi taghayyur nahi aata. Haraam amal nek niyyat se bhi halaal nahi ho jaata.

2️⃣ Ta'at wa Ibadaat-e-Maqsuda

Yeh woh ibadaat hain jin ki sehat bhi niyyat ki muhtaaj hai aur fazeelat bhi jaise namaz, roza, zakaat.

3️⃣ Mubah Aamaal

Yeh ba-zaahir dunyawi kaam hain magar pakeeza niyyat ke saath ibaadat ban sakte hain jaise kasb-e-ma'ash, khana, sona, nikah.

Lehaza sirf amal nahi karna, qabl az amal dil ki simt ko bhi durust karna hai.....

Follow the

✍️📜Qalam-e-Hikmat📜📚

Channel on WhatsApp:

https://whatsapp.com/channel/0029Vb6ClOvDuMRbbKrnXM3B