Hadd se badhi hui khamoshi ki qeemat
Mufti Muhammad Tasleem ud Din Al Mahmoodi
Zindagi ne waqai hazaron sabaq sikhaye hain, magar un sab mein ek sabaq aisa bhi sikhaya jo dil par naqsh ho kar reh gaya. Yeh sabaq waqt ki kitaab mein nahi likha hota, balkeh insaan ke ravaiyyon, be qadriyon aur khamoshiyon ke beech reh kar seekhne milta hai.
Hum aksar yeh samajh baithte hain ke agar hum kisi ke sukoon ke liye khud ko bhula dein, us ki har laparwahi ko apni muskurahat mein lapait lein, us ki har ghalti ko mohabbat ka naam de dein, toh shayad woh hamein samajh le. Shayad woh kabhi palat kar dekhe ga ke kisi ne us ke liye apni zaat ke kitne hisse qurban kiye hain. Magar haqeeqat yeh hai ke baaz log aap ke jhukne ko aap ki mohabbat nahi, aap ki kamzori samajh lete hain.
Aap agar kisi ke qadmon ki khaak bhi ban jayen, tab bhi woh khud ko aap se bartar hi samjhe ga. Kyunke jo insaan sirf apna sukoon dekhne ka aadi ho jaye, woh doosre ke tootne ki aawaz kabhi nahi sun paata. Aap us ke liye apni raaton ki neend qurban karein, apne dil ke zakhm chhupate rahein, apni ana ko baar baar marein. Woh phir bhi ek lamhe mein, ek be bunyaad si wajah ghad kar, aap ke zehni sukoon ko tehas nehas kar de ga. Aur sab se ziyada takleef deh baat yeh hoti hai ke usse zara sa bhi afsos nahi hoga.
Yahan insaan seekhta hai ke hadd se ziyada bardasht aksar ehtaraam nahi laati, balkeh be qadri ko janam deti hai. Har khamoshi sabr nahi hoti, kabhi kabhi woh andar hi andar mar jaane ka elaan hoti hai. Aur har muafi azmat nahi, baaz auqaat woh khud se ki gayi sab se badi na insafi ban jati hai.
Zindagi ka yeh sabaq talkh zaroor hai, aur zaroori bhi. Yeh sikhata hai ke khud ko itna mat girao ke koi tumhein raund kar bhi sharminda na ho. Mohabbat karo, wafa karo, qurbani do. Magar apni zaat ki qeemat par nahi. Kyunke jo shakhs aap ke tootne par bhi pasheman na ho, woh aap ki zindagi mein kabhi ahem nahi ho sakta.