*Diyanat ka daaman na chhod __!!*

Aik tajir apni mehnat se kamyab hua aur aik bohat badey idarey ka malik ban gaya. Jab woh boodha hogaya to uss ney idarey ke directoron mein se kisi ko apna kaam sonpney ki dilchasp tarkeeb nikali. Uss ney idarey ke tamam directoron ka ijtima talab kiya aur kaha “Meri sehat mujhe ziyada der tak apni zimmedariyan nibhaney ki ijazat nahi deti isliye mein aap mein se aik ko apni zimmedariyan sonpna chahta hun. Mein aap sab ko aik aik beej dunga. Isse bone ke aik saal baad aap is ki surat-e-haal se mutla karenge jis ki bunyad par mein apni zimmedariyan sonpney ka faisla karunga.
Kuch arsa baad sab director apne beej se ugney waley podon ki tareefein karne lagey siwaye Zaid ke jo pareshan tha. Woh khamosh rehta aur apni khiffat ko mitaney ke liye mazeed mehnat se daftar ka kaam karta raha. Darasal Zaid ne naya gamla khareed kar uss mein nayi mitti daal kar behtareen khad dali thi aur rozana pani bhi deta raha tha magar uss ke beej mein se poda na nikla.
Aik saal baad idarey ke sarbarah ne phir sab directors ka ijtima bulaya aur kaha ke sab woh gamley le kar aayen jin mein unhon ne beej boya tha. Sab khubsurat podon waley gamlon ke sath ijtima mein pahunche magar Zaid jis ka beej uga nahi tha woh khali hath hi ijtima mein shamil hua aur idarey ke sarbarah se door wali kursi par baith gaya. Ijtima shuru hua to sab ne apne beej aur pode ke sath ki gayi mehnat ka haal sunaya is umeed se ke usse hi sarbarah banaya jaye.
Sab ki taqreerein sunney ke baad sarbarah ne kaha aik aadmi kam lag raha hai. Iss par Zaid jo aik aur director ke peeche chhupa baitha tha khada hokar sar jhukaye bola “Janab. Mujh se jo kuch hosaka mein ne kiya magar mera wala beej nahi uga”. Iss par kuch sathi hanse aur kuch ne Zaid ke sath hamdardi ka izhaar kiya.
Chai ke baad idarey ke sarbarah ne elaan kiya ke is ke baad Zaid idarey ka sarbarah hoga. Iss par kayi hazireen majlis ki hairani se cheekh nikal gayi. Idarey ke sarbarah ne kaha “Iss idarey ko mein ne bohat mehnat aur diyanatdari se iss maqam par pahunchaya hai aur mere baad bhi aisa hi aadmi hona chahiye aur woh Zaid hai jo mehnti honey ke sath dianatdar bhi hai. Mein ne aap sab ko ubley hue beej diye they jo ug nahi sakte. Siwaye Zaid ke aap sab ne beej tabdeel kar diye”
Ae bandey! Mat bhool ke jab koi nahi dekh raha hota to paida karne wala dekh raha hota isliye diyanat ka daaman na chhod..
Khatam shud