Shan-e-Rasool ﷺ: Haqaiq, Aitrazaat aur Haqeeqat ka Difa
Yeh baat haq, sach aur dalail-e-qatia se sabit shuda hai ke Rasool-e-Akram ﷺ ki zaat-e-aqdas mehaz aik aam bashar ki haisiyat nahi rakhti, balkay woh Allah Taala ke woh bargazeeda aur muntakhab Rasool hain jin ke sadqe mein poori kainat ko wujood bakhsha gaya. Yehi woh haqeeqat hai jise Quran-e-Majeed ne mukhtalif asaaleeb mein wazeh farmaya aur jis par ummat-e-Muslima sadiyon se imaan rakhti aayi hai.
Allah Taala Khaliq-e-Haqeeqi hai, Raaziq-e-Mutlaq hai, magar isi Allah ne apne Mehboob ﷺ ko ata farmane wala, bantne wala aur qasim banaya. Jo kuch Rasool-e-Akram ﷺ ko ata hua, woh Allah ki ata hai, aur is ata ko manna ain-e-imaan aur maslak-e-Ahl-e-Sunnat wal Jamaat ka bunyadi aqeeda hai.
Hum Musalman hain, Quran par imaan rakhte hain, ahadees-e-Nabawiya ko haq mante hain, aur agar Quran-e-Muqaddas ka tehqeeqi, tadabburi, tanqeedi aur tajziyati mutala akhlas ke sath kiya jaye to yeh haqeeqat bilkul wazeh ho jati hai ke Allah Taala ne Rasool-e-Akram ﷺ ko apne atai ilm mein se woh sab kuch ata farmaya jo hidayat-e-khalq, islaah-e-ummat aur qayamat tak aane wale fitnon ki rehnumai ke liye zaroori tha. Nabi ﷺ ka ilm zaati nahi balkay atai hai, aur atai ilm ka manna shirk nahi balkay tauheed-e-khalis ka taqaza hai.
Is ke bawajood aaj ke daur mein kuch gumrah giroh jaise Nadvi, Deobandi, Wahabi, Shia jamatein, Khawarij, Rawafiz, Qadiani aur Mulhideen Rasool-e-Akram ﷺ ki shaan mein tarah tarah ke aitrazaat uthate hain aur ummat mein shukook o shubhat phailane ki koshish karte hain.
Yeh log kehte hain ke Rasool-e-Akram ﷺ ko ilm-e-ghaib haasil nahi tha aur woh sirf aam insano ki tarah ilm rakhte thay, halanke Quran khud elaan karta hai ke Allah apne Rasoolon ko ghaib mein se jitna chahe ata farmata hai. Ahadees-e-Saheeha mein Nabi ﷺ ne qayamat tak pesh aane wale waqiat, fitnon, ashraat-e-saat aur ummat ke halaat ki khabrein dein, jo is baat ka wazeh saboot hain ke Allah Taala ne apne Mehboob ﷺ ko wasee aur ghair mamooli ilm ata farmaya.
Yehi log yeh bhi kehte hain ke Nabi ﷺ hamari hi tarah bashar thay, un ko koi khaas fazeelat ya imtiaz haasil nahi tha, halanke Ahl-e-Sunnat ka aqeeda yeh hai ke Nabi ﷺ bashar zaroor hain magar aam bashar nahi. Bashar hona nuqs nahi, balkay bashar ho kar Allah ka Rasool hona sab se bada kamal hai. Quran ne jahan Nabi ﷺ ke bashar hone ko bayan kiya, wahein un ke wahi yafta, bargazeeda aur muqarrab hone ko bhi wazeh farmaya.
Yeh log yeh aitraaz bhi karte hain ke Rasool-e-Akram ﷺ ko Allah Taala ne koi ikhtiyar nahi diya, na woh kisi ko nafa pahuncha sakte hain aur na nuqsan, halanke yeh baat Allah ki ata ka inkaar hai. Ahl-e-Sunnat ka aqeeda yeh hai ke fail-e-haqeeqi Allah hai, magar woh jise chahe apne izn se ikhtiyar ata farmata hai, aur Rasool-e-Akram ﷺ ko Allah ne apne hukm se ata farmane wala aur qasim banaya, na ke mustaqil bil zaat.
Phir yeh log kehte hain ke Rasool ﷺ ke waseele, un ki taazeem, un ke maqam o martabe ka bayan karna ghulu aur bidat hai, halanke Quran khud Rasool ﷺ ki taazeem, adab aur itaat ka hukm deta hai. Sahaba-e-Kiramؓ Nabi ﷺ ke waseele se dua karte thay, Aap ﷺ ke aasaar se barkat haasil karte thay, aur Aap ﷺ ki shaan ko imaan ka hissa samajhte thay. Yeh amal na bidat hai aur na ghulu, balkay ain-e-sunnat hai.
Yehi log yeh bhi kehte hain ke Rasool ﷺ ko “har cheez ata hona” kehna Quran ke khilaf hai, halanke Ahl-e-Sunnat kabhi yeh dawa nahi karte ke Nabi ﷺ ko Allah ke barabar ilm haasil hai, balkay yeh kehte hain ke Allah ne apne Rasool ﷺ ko apne atai ilm se woh sab kuch ata farmaya jo makhlooq ki hidayat ke liye zaroori tha, aur yehi baat Quran ke umoom, ahadees aur aimma ummat ki tasreehat se sabit hai.
Darhaqeeqat yeh tamam aitrazaat aik hi maqsad ke gird ghoomte hain, aur woh maqsad Rasool-e-Akram ﷺ ki shaan ko ghatana, un ke maqam ko mehdood karna aur ummat ko fikri inteshar mein mubtala karna hai. Aise logon ko samajhna chahiye ke jis Rasool ﷺ ke sadqe mein kainat bani, jis ke zariye Quran hum tak pahuncha, aur jis ki itteba ke baghair imaan mukammal nahi hota, usi Rasool ﷺ ki shaan mein aitraaz karna Quran o Sunnat ki roshni mein sakht gumrahi hai, aur aise tarz-e-fikr rakhne walon ke liye sakht waeedein warid hui hain.
Lehaza hum sab ke liye zaroori hai ke taasub, zidd aur nafs parasti ko chhod kar siraat-e-mustaqeem par chalein, Allah aur us ke Rasool ﷺ ke raaste ko ikhtiyar karein, aur maslak-e-Ahl-e-Sunnat wal Jamaat ke mutabiq apne aqaid ko mazboot karein.
Allah Taala hamein Nabi Kareem ﷺ ki sachi mohabbat, kaamil adab, durust aqeeda aur fitnon se hifazat ata farmaye, aur hamein haq par sabit qadam rakhe. Ameen.

📍📍📍
Tehreer: Muhammad Fida-ul-Mustafa Qadri 
Rabta Number: 9037099731
PG Scholar: Darul Huda Islamic University