Aik jagah jana hua wahan bohat hi laziz mat'oomat thi magar chaye nahi thi, is mauqa par yeh tehreer likhi gayi hai
Sab kuch tha maujood lekin
Zalim ne aik chaye ki na punchhi
Khair is waqt dil mein aur ab dauran-e-tehreer jis cheez ki hasrat rahi woh hamari mashooqa chaye thi, sab kuch tha, magar chaye nahi thi, hum kehte to chaye ba'asani mil sakti thi, magar yun kehne se chaye ki lazzat khatam ho jati hai, is liye kaha bhi nahi aur kehna munasib bhi nahi tha, agar is barkat bhare khane ke sath chaye ki tohmat lagi hoti to aik qist chaye ke naam mutayyan thi, itni jaldi khane ki tafseel se nikalna mumkin na tha, mashroobat o mat'oomat mein se sab se ziyada agar kisi par likha gaya hai to woh wahid "chaye" hai, qalamkar chaye par likhte zaroor hain, khwah woh chaye ke maddahon hon ya naqideen, agar chaye ka shauqeen ho, mauzoo-e-tehreer chaye ho to phir chaye ko Ashraf ul Mashroobat kehna mamooli baat hoti hai, chaye ke nama nigar ko agar taeed ki zaroorat pesh aa jaye to phir hamare ajal akabir bhi chaye ke mashooqeen mein khade nazar aate hain, chaye ka maddah Maulana Abul Kalam Azad ke chaye se ishq ko yun tabeer karta hai "Chaye Maulana Abul Kalam Azad ki wajah se mashhoor hui ya Maulana Abul Kalam Azad chaye ki wajah se mashhoor hue" Maulana Zafar Ali Khan ne to kamal hi kar diya farmate hain:
Chaye peeta hun to ho jata hai imaan taza
Chaye noshi meri derina rawayaat se hai
Hazrat Ameer-e-Shariat Ataullah Shah Bukhari ke paas chand bade ulama bator-e-mehman tashreef farma the, Hazrat ne chaye mangwai, unhon ne inkar kiya to Hazrat ne farmaya: "Chaye majlis ki zeenat hai, is ko riwayat kiya hai Bukhari o Muslim ne" phir az rah-e-mazah hi farmaya "Chaye ka inkar muttafiq alaih kufr hai" Sheikh ul Hadith Mufti Muhammad Zarwali Rehmatullah Alaih ke mutalliq suna hai ke woh farmate the: "Chaye se badan mein chusti aur hararat paida hoti hai" al gharz chaye ke kitne fawaid hain, un ka to shumar nahi, lekin itna zaroor hai
Chaye peene se chah hoti hai
Aane jane ki rah hoti hai
Chaye ki mehfilon mein rozana aalmi naqsha tabdeel hota hai, har chaye khana par siyasi namwar qaideen ki bain ul aqwami majalis mun'aqid hoti hain, chaye ghar par har aira ghaira khilafat-e-usmania ki naveed sunata hai, siyasi goonge ko bhi chaye cup se quwwat-e-goyai hasil ho jati hai, chaye se bughz rakhne wale Mushtaq Ahmed Yusufi ki kitab "Chiragh Tale" padh kar sukoon hasil kar sakte hain, tehreer ke shandar aur jandar na hone par afsos ki zaroorat bilkul nahi hai, kyun ke yeh chaye se mahroomi par likhi gai hai, agar chaye padh kar kuch likha jaye to baat hi kuch aur hoti hai.
Aaye na zara hath mere chahe kuch bhi
Chaye ka magar cup hathon se na chhote
Tehreer: Abdullah Yusuf
23/Rabi ul Awwal 1447 Hijri.
Ba roz Mangal