Nayi Nasl Aur Social Media Ka Andha Bahao
✒️ Mufti Muhammad Tasleem ud Din Al Mahmoodi
Guzarte Waqt Ke Sath Sath Social Media Ki Yalgar Ne Hamari Soch Aur Tarz-e-Zindagi Ko Jis Tarah Mutasir Kia Hai, Woh Nihayat Afsosnak Hai. Facebook, WhatsApp, YouTube, Twitter, Instagram Aur TikTok Jaise Apps Ne Hamari Duniya Ko To Rangeen Bana Dia, Lekin Hamari Aakhirat Ki Tayyari, Deen Se Wabastagi, Taqwa Wa Parhezgari Aur Amaal-e-Saliha Se Rishta Kamzor Kar Dia.
Deeni Wa Rohani Pehlu
Yeh Apps Hamare Dil O Dimagh Ko Aise Masroof Kar Deti Hain Ke Quran Ki Tilawat, Zikr O Azkar Aur Namaz Ki Lazzat Ham Se Chhin Gayi Hai.
Allah Ta'ala Se Qurb Hasil Karne Ke Bajaye Hum "Likes, Comments Aur Followers" Ke Peeche Daudte Rehte Hain.
Yaksooyi Aur Sukoon-e-Qalb, Jo Ibadat Ka Asal Haasil Hai, Woh Mobile Ki Is Screen Par Be Maqsad Masroofiyat Ki Nazar Ho Chuka Hai.
Gharelu Aur Muashrati Asraat
Gharon Mein Pehle Mohabbat Bhari Guftagu Aur Mushawarat Ka Mahol Hota Tha, Magar Ab Har Shakhs Apne Mobile Ki Duniya Mein Qaid Hai.
Rishte Kamzor Ho Rahe Hain, Maa Baap Aur Aulaad Ke Darmiyan Fasla Badh Raha Hai, Aur Muashrati Taalluqaat Mahaz Rasmi Aur Masnoi Reh Gaye Hain.
Muashra Jis Bunyaad Par Qaim Rehta Hai, Yani Akhlaq, Taa'wun Aur Humdardi, Woh Sab Social Media Ke Shor Mein Dab Kar Reh Gaye Hain.
Naujawanon Ki Halat
Aaj Ka Naujawan Ummat Ka Mustaqbil Hai, Lekin Woh Apni Salahiyaten Be Kar Videos, Fuzool Chatting Aur Satahi Tafreehat Par Zaya Kar Raha Hai.
Deen Ke Bunyadi Ahkaam O Aqaid Se Nabalad Naujawan Fashion, Musiqi Aur Viral Clips Mein Gum Hain.
Waqt Ki Qadar Aur Mehnat Ka Jazba Khatam Ho Raha Hai, Natijatan Taleem Mein Kamzori, Akhlaq Mein Bigar Aur Amli Zindagi Mein Be Simti Badh Rahi Hai.
Instagram Aur TikTok Ke Rujhanaat Ne Nayi Nasl Se Haya, Waqar Aur Sanjidgi Chheen Li Hai. Aaj Ke Ladke Aur Ladkiyan Asal Maqsad-e-Zindagi Ko Bhool Kar Mahaz Waqti Shohrat Aur Dunyawi Lazzaton Ke Peeche Lage Hain.