Zahir o Batin: Fareb-e-Jamal ya Haqiqat ka Parda?
✒️ Muhammad Tasleem ud Din Al Mahmoodi
Zaroori nahi jo dikhta hai wohi ho...
Muashray ne aaj aisay naqab odh liye hain ke sachai chehron se nahi, kirdaaron se bhi aujhal ho chuki hai. Aaj ke daur mein chamakte libas, branded joote, mehnge mobile aur masnoi muskurahatein sab kuch batati hain, siwaye sach ke.
Hum aisay muashray mein jee rahe hain jahan qeemat kapron ki dekhi jati hai, kirdar ki nahi. Jahan libas ki maliyat se insan ki azmat maapi jati hai, aur dil ki sachai mehaz aik kamzor jazba samjha jata hai. Saada baat hai:
Kapre mehnge, dil saste bhi hote hain.
Yeh woh daur hai jahan khush akhlaqi aik social media strategy ban chuki hai, ikhlas ab maslehat ke parde mein chupa nazar aata hai, aur sakhawat aksar numood o numaish ki tasveer ban gai hai. Jisay dekh kar rashk aye, zaroori nahi ke woh khush ho, aur jo khandaan ho, zaroori nahi ke us ke dil mein sukoon ho.
Aisa kyun hai?
Kyunke hum ne zahir parasti ko miyar-e-fazilat bana liya hai. Hum ne jhoote miyaron ko apni qadar ki tarazoo mein rakh diya hai. Ab izzat us ki hai jis ke paas mehnga libas hai, chahe woh jhoot bolta ho, wade toota ho, ya dilon ko zakhmi karta ho.
Hum bhool gaye ke libas shakhsiyat ka hissa ho sakta hai, magar insaniyat ka paimana hargiz nahi. Woh log jo saadgi se jeete hain, dilon mein wusat rakhte hain, wade nibhate hain, aur mukhlis hote hain — woh aksar nazar andaz ho jate hain kyunke un ke kapron par brand ka label nahi hota.
Dil saste ho chuke hain kyunke hum ne inhen bazaron mein tolna shuru kar diya hai. Aaj koi mushkil mein ho to poochne wala nahi, magar agar kisi ki saalgirah ho to tasweeron ki bharmar.
Agar koi girya kare to khamoshi,
Aur agar koi hanse to tabsare.
Yeh waqt hai, hum ruk kar sochen:
Kya hum ne insan ko insan ke taur par parkhna chor diya hai?
Kya hum ne batin ki roshni ko zahiri chamak damak mein dafan kar diya hai?
Ab bhi waqt hai…
Hum zahiri polish ke bajaye dilon ki safai ki taraf tawajjah den.
Kapron se ziyada kirdar ko qeemti janen.
Aur is sachai ko pehchanen ke:
Mehnge kapre insan ko izzat to dilwa sakte hain, magar mohabbat sirf mukhlis dil hi dilate hain.