قسط نمبر 1
*جامع مسجد دہلی کے حوض کی جالی کی حقیقت
کیا ہے؟*
✍🏻*محمد عادل ارریاوی*
______________________________
جامع مسجد دہلی میں جب آپ کسی بھی دروازے سے اندر داخل ہوں گے تو سب سے پہلے وضو کے لیے بنا ہوا پانی کا حوض نظر آئے گا۔ حوض کے مغربی اور شمالی کونے میں ایک مقام ایسا ہے جسے لوہے کی جالیوں سے محفوظ کر دیا گیا ہے۔
آج جامع مسجد دہلی میں مغرب سے قبل جب میں وضو کرنے لگا تو حوض کے ایک کونے میں لگی ہوئی وہ چھوٹی سی جالی میری نظر میں آئی وضو سے فارغ ہو کر میں بڑی دیر تک غور سے اسے دیکھتا رہا کہ آخر اس کے اندر کیا ہے مگر کوئی حقیقی بات سمجھ میں نہ آئی۔
اتنے میں ایک نوجوان میرے پاس آیا اور کہنے لگا مولانا آپ اتنے غور سے کیا دیکھ رہے ہیں میں نے کہا میں یہ جالی دیکھ رہا ہوں کہ آخر اس جگہ جالی کیوں لگائی گئی ہے وہ کہنے لگا جب مغل شہنشاہ شاہ جہاں نے جامع مسجد کی تعمیر مکمل کروائی تو ایک رات خواب میں دیکھا کہ حضور اکرم صلی اللّٰہ علیہ وسلم اسی مقام پر وضو فرما رہے ہیں۔ صبح بیدار ہونے کے بعد شاہ جہاں نے اس جگہ کو جالی سے محفوظ کروا دیا اسی لیے آج تک یہ مقام بند ہے۔
یہ بات سن کر مجھے بڑی حیرت ہوئی۔ میں نے بہت سوچا کہ آخر یہ روایت کہاں تک صحیح ہے کیونکہ میری معلومات کے مطابق تاریخ کی معتبر کتابوں میں اس واقعے کا کوئی مستند ثبوت موجود نہیں۔ جامع مسجد کی تاریخ میں حوض اور اس کے نظام کا ذکر ضرور ملتا ہے لیکن اس خواب اور جالی والی روایت کی کوئی معتبر تاریخی بات نہیں ملتی۔
خیر اہلِ علم اور تاریخ سے واقف حضرات بتائیں کہ اس جالی کی حقیقت کے بارے میں کوئی مستند بات ہوں تو ضرور رہنمائی فرمائیں۔
واللّٰہ اعلم۔