*Sab thaath para rahe jawe ga jab laad chale ga banjara*
*✍🏻 Muhammad Palan Puri*
*ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ*
Yeh misra insaan ki poori zindagi ke ghuroor ko aise kaat kar rakh deta hai jaise kisi tez dhaar churi se reshmi dhaga kat jaye. Insaan apne ird gird ke maal o asbaab dekh kar samajhta hai ke yeh sab us ki milkiyat hai, us ki kamai hai, us ki mehnat ka samar hai magar maut ka qafila jab bansuri bajata hua aata hai to sare thaath, sari daulat, sari kursi, sare mansab, sari ana sab dhool ho jate hain aur insaan ek aisi musafat ki taraf rawana hota hai jahan us ke saath na bank balance jata hai, na social status, na shohrat ki gard, na kamyabiyon ke haar bas faqat aamaal ka mukhtasar sa tosha saath jata hai.
Zindagi ka ajeeb mela hai ke ek taraf tajdar hain jo apni sone ki masnad par baithe apni ana ki mashalen jala rahe hain aur doosri taraf gada hain jo apne pyale mein khwabon ke tukre jama kar rahe hain. Dono ko lagta hai ke woh bohat kuch rakhte hain magar jab banjara laad leta hai aur aakhri qafila rawana hota hai to dono ki manzil ek hi ho jati hai aur woh hai muthi bhar zameen aur do gaz kafan.
Kitni ajeeb baat hai na ke insaan apne gharon ki eenten ginta hai, apni gariyon ka hisaab rakhta hai, apne kapron ke rangon tak ki tarteeb tay karta hai magar maut jo use apne do hathon se utha kar le jaye gi us ke liye koi tayyari nahi karta. Duniya ki chand saaton ke liye hum larte, bhirte, jalte, bharkte rehte hain. Kisi ki zara si baat hamari ana ko aag lagati hai, kisi ka mamooli sa faida hamein hasad ki khai mein gira deta hai. Humein lagta hai ke sab kuch hamare ikhtiyar mein hai magar haqeeqat? Haqeeqat yeh hai ke hum khud apne ikhtiyar mein nahi.....
Kabhi kabhi kisi janaze ke peeche chalte hue dil par aisa dhachka lagta hai jaise waqt kisi bachche ki tarah hamara girebaan pakar kar keh raha ho ke chal! teri bari bhi aane wali hai. Aur hum phir bhi apne thaath paath ke peeche bhagte rehte hain.....
Aaj jin mahlaat mein hum apni kamyabiyon ki kahaniyan sajate hain, chand dahaiyon baad unhi mahlaat mein koi hamein jaanta tak nahi hoga. Aaj jin zameenon par hum milkiyat ke parcham garte hain kal unhi zameenon ke neeche hamari shanakht mitti ho jaye gi. Aaj jin logon ki wah wah hamein khud par naaz dilati hai unhi logon ke samne hum kal ek lakri ke taboot mein khamosh lete honge aur woh chand lamhe afsos karke wapas apni duniya mein mashghool ho jayen ge.....
Zindagi ka asal almiya yeh nahi ke hum mar jayen ge balke zindagi ka asal almiya yeh hai ke hum zindagi ko marne ke baad samajhte hain. Jab waqt ki rerhi aati hai, banjara pukarta hai aur hamari sansen apni seerhiyan utarne lagti hain tab insaan ko maloom hota hai ke asal daulat woh lamhe the jo us ne Allah ki yaad mein, makhlooq ki bhalai mein aur dil ki safai mein guzare the. Baqi sab mehaz hujoom e hawas tha jo qabar ke dahane par aakar ret ke zarron ki tarah bikhar jata hai.....
Is liye ae insaan! zara tham ja, zara ruk ja, zara soch le ke yeh thaath paath tere nahi, tere saath nahi jayen ge. Tere saath to woh aansu jayen ge jo kisi mazloom ne teri wajah se ponch dale the, woh dua jaye gi jo kisi ghareeb ne teri mohabbat mein di thi, woh neki jaye gi jo tu ne chhupa kar ki thi, woh maafi jaye gi jo tu ne dil bara karke di thi.
Baqi sab ? Sab thaath para rahe ga jab laad chale ga banjara........