Review of the book "Kuch Log Aisay Bhi" *Reviewer: Fuzail Akhtar Qasmi Bhairvi*

*Tabserah Bar Kitaab "Kuch Log Aisay Bhi"*

*Kitaab: Kuch Log Aisay Bhi*

*Taaleef: Maulana Mufti Muhammad Tabrez Aalam Haleemi Qasmi*

*(Ustaad-e-Hadees wa Fiqh, Jamia Islamia Darul Uloom, Hyderabad, Telangana)*

*Tarteeb wa Tazeen: Aiman Zafar Azhari*

*Safhaat: 411*

*Naashir: Maktaba Zia-ul-Kutub Khairabad, Zila Mau, UP India*

*Tabserah Nigaar: Fuzail Akhtar Qasmi Bhairvi*

Tehreer jab qalb ki sadaqat aur shaoor ki baalidgi se janam le, aur qalam jab ikhlaas, aqeedat aur riwayat ke aab-e-zar se serab ho, to woh alfaaz ki kainat mein aisi kitaab ki takhleeq ka sabab banti hai jo sirf parhne ke liye nahi balkay mehsoos karne ke liye likhi jati hai. Maulana Mufti Muhammad Tabrez Aalam Haleemi Qasmi ki yeh kitaab *"Kuch Log Aisay Bhi"* aisi hi ek maanvi, fikri aur roohani kavish hai, jo wafa ke lehjay mein gandhi, adab ki khushboo mein rachi aur nisbat-e-ilm-o-irfan ki zanjeer mein proi gayi hai.

Yeh kitaab darhaqeeqat ek hassas dil, mushahida afroz nigah aur jazba-e-aqeedat se sershaar qalam ki takhleeq hai. Muallif-e-mohtaram ne un shakhsiyat ke nuqoosh-e-dawaam ko tehreer ka jaama pehnaya hai jinhon ne gumnaami ki chadar odh kar azmat ke taaj pehne, jin ki zindagiyan chiragh-e-rah ban kar naslon ki fikri wa roohani tarbiyat ka zariya banien.

Is kitaab mein kai mazameen un asaatzah-e-kiraam, mashaikh-e-izam aur arbaab-e-ilm-o-adab par mushtamil hain jin se muallif ne barah-e-raast ya bilwaasta faiz paya. Baaz mazameen woh hain jo wafat ke baad izhaar-e-wafa, aitraaf-e-azmat aur tazkaar-e-khair ke jazbay ke tehat raqam kiye gaye. Yeh mazameen na sirf shakhsi khakay hain, balkay woh aaine hain jin mein ek purasar aur ba waqar ilmi muaashray ka aks jhalakta hai.

Muallif ne dauran-e-dars aur mukhtalif ilmi wa fikri nashiston mein akabir asatza-e-kiraam se jo nikaat, malfuzaat, aur ilmi batein suni, unhein dil ke nihan khanay mein mehfooz rakha, aur ab is haseen gulshan mein unhein bari saleeqa mandi aur husn-e-tarteeb se yakja kar diya hai. Yeh ilmi nikaat sirf yaadashtein nahi balkay hikmat ke gohar, baseerat ke chiragh aur tajurbe ki roshni hain, jo taalib-e-ilm ke fehm-o-shaoor mein ras ghol dete hain.

Usloob mein salasat, shaguftagi, tehzeeb, aur matanat ki aamaizish hai. Jumlay maanvi aitbaar se gehre aur asaaleeb-e-bayan mein murassa hain. Muallif ke yahan adabi husn, fikri tawazun aur lisaani chabukdasti ka imtezaj aisa hai ke qaari har safhay par na sirf ek ilmi lazzat mehsoos karta hai balkay ek roohani tamaneenat se bhi humkinaar hota hai.

Is kitaab ka zahiri husn bhi baatin ki latafat ka tarjuman hai. Rangeen tabaat, nafees title, aur khush khat kitaabat yeh sab is baat ki daleel hain ke naashir ne na sirf ilmi waqat balkay jamaliyati latafat, fanni nazakat aur deedah-o-dil nawazi ko bhi pesh-e-nazar rakha hai.

Maktaba Zia-ul-Kutub Khairabad Zila Mau UP India jis ke zimmedar fazil-e-mohtaram, sahib-e-zauq, aur ilm-o-adab ke shinaawar Hazrat Maulana Zia-ul-Haq Sahib Qasmi Daamat Barkatuhum-ul-Aaliya (Haji Babu) hain, jinhein yeh sharaf haasil hai ke woh Raees-ul-Qalam Hazrat Maulana Ijaz Ahmad Sahib Bhairvi Azmi Noor Allah Marqadahu jaise azeem adeeb, qadir-ul-kalaam musannif aur khush zauq murabbi ke shagird-e-rasheed hain. Maulana Zia-ul-Haq Sahib khud bhi darjanon waqee ilmi wa adabi kitaabon ke musannif hain, aur buland paya zauq ke hamil hain.

Woh is intekhab-e-kutub aur umda tabaat par baja taur par tehseen wa tabreek ke mustahiq hain.

Yeh baat bhi qabil-e-zikr hai ke kitaab ke andar khud Hazrat Maulana Ijaz Ahmad Azmi Rehmatullah Alaih ka taaruf nihayat mukhtasar magar jaame andaaz mein shaamil hai.

*"Kuch Log Aisay Bhi"* mehaz ek kitaab nahi, balkay yeh adab-e-shakhsiyat nigari, fann-e-tazkira naveesi, aur riwayat-e-ikhlas wa nisbat ka nafees milaap hai. Yeh un tamam hazraat ke liye tohfa hai jo ilm-o-amal ki wirasat se mohabbat rakhte hain, aur un hastiyon ko yaad rakhna chahte hain jinhon ne zindagi ki tareekiyon mein chiragh roshan kiye.

Dua hai ke Rabb-e-Kareem ustaad-e-mohtaram ki is ilmi kavish ko sharaf-e-qabooliyat ata farmaye, muallif ko jazaye khair de, aur is kitaab ko naslon ke liye faiz-e-aam ka zariya banaye. Ameen Ya Rabb-ul-Aalameen.

*Az Fuzail Akhtar bin Irfan Ahmad Bhairah Zila Mau UP Mutallim Darul Uloom Hyderabad Telangana*