خلوص کے چند الفاظ
🪶از:ح عائش✰
آج میں نے ایک نیک دل انسان کو اپنی عزیز دوست کے والدِ محترم کے انتقال کی خبر دی اور ان کے لیے ایصالِ ثواب اور دعائے مغفرت کروانے کی درخواست کی۔ پھر اپنی دوست کے غم اور پریشانی کا ذکر بھی کیا۔ دل میں ایک عجیب سی فکر اور بے چینی تھی، کیونکہ جب کوئی اپنا کسی غم سے گزر رہا ہو تو اس کی پریشانی کہیں نہ کہیں ہمارے دل کو بھی بے سکون کر دیتی ہے۔
مگر سامنے سے صرف ایک جملہ سننے کو ملا:
"آپ بے فکر رہیں۔"
یقین مانیں، یہ جملہ سنتے ہی آنکھیں نم ہوگئیں۔
پتا نہیں کیوں، مگر ان چند لفظوں میں ایسی اپنائیت، ایسا خلوص اور ایسی تسلی تھی کہ دل بھر آیا۔ میں نے ان کا شکریہ ادا کیا، مگر دل میں یہ احساس بھی تھا کہ اس ایک جملے کے لیے شکریہ شاید بہت چھوٹا لفظ ہے۔
کبھی کبھی کوئی ہماری پریشانی ختم نہیں کرتا، بس ہماری فکر کو سمجھ لیتا ہے… اور یہی احساس دل کو سنبھالنے کے لیے کافی ہوتا ہے۔
بے شک اللہ تعالیٰ ہر وقت ہمارے ساتھ ہے۔ وہ ہمارے دل کا حال ہم سے بھی بہتر جانتا ہے، ہماری بے چینی، ہماری خاموشی اور ہمارے دل میں چھپی ہر فکر سے واقف ہے۔ مگر انسان بھی عجیب ہے؛ کبھی کبھی دل کا بوجھ ہلکا کرنے کے لیے اپنی کیفیت کسی ایسے شخص کے سامنے رکھ دیتا ہے جس پر اسے اعتماد ہو، جسے وہ اپنا سمجھتا ہو، اور جس سے صرف چند تسلی کے الفاظ سن کر بھی دل کو قرار آ جائے۔
شاید اسی لیے "آپ بے فکر رہیں" جیسے معمولی سے لگنے والے الفاظ بھی کبھی دل کے اندر بہت دور تک اتر جاتے ہیں۔ ان میں یہ احساس چھپا ہوتا ہے کہ آپ کی بات سنی گئی ہے، آپ کی فکر سمجھی گئی ہے، اور آپ اس لمحے اکیلے نہیں ہیں۔
اس بھیڑ بھری اور مطلبی دنیا میں جہاں ہر شخص اپنی الجھنوں میں الجھا ہوا ہے، ایسے مخلص لوگ مل جانا واقعی اللہ تعالیٰ کی نعمت ہے؛ جو صرف ہماری بات نہیں سنتے بلکہ ہمارے غم کو محسوس کرتے ہیں، ہماری پریشانی کو اہمیت دیتے ہیں اور ہمارے اپنوں کے دکھ کو بھی اپنے دل سے محسوس کرتے ہیں۔
تب دل کو یقین ہوتا ہے کہ دنیا ابھی بالکل بے حس نہیں ہوئی…
ابھی بھی کچھ دل ایسے ہیں جن میں دوسروں کے لیے جگہ ہے، کچھ لوگ ایسے ہیں جنہیں ہماری فکر ہوتی ہے، اور کچھ رشتے ایسے ہیں جن میں خلوص لفظوں کا محتاج نہیں ہوتا۔
اور شاید سب سے خوبصورت احساس یہی ہے کہ ہم کسی کے لیے عزیز ہیں۔
اتنے کہ ہماری فکر، ہماری پریشانی اور ہمارے اپنوں کا غم بھی کسی دوسرے دل کو چھو جاتا ہے۔
اللہ تعالیٰ ایسے مخلص لوگوں کو ہمیشہ سلامت رکھے، ان کے دلوں کو سکون عطا فرمائے، ان کی ہر پریشانی آسان فرمائے اور انہیں ہمیشہ دوسروں کے لیے خیر، آسانی اور سکون کا ذریعہ بنائے۔ آمین۔
کچھ لوگ بڑے بڑے وعدے نہیں کرتے، بس ایک جملہ کہتے ہیں:
"آپ بے فکر رہیں۔"
اور کبھی کبھی یہی ایک جملہ دل کو وہ سکون دے جاتا ہے جس کی اسے اس وقت سب سے زیادہ ضرورت ہوتی ہے۔