Mohtaram Qalamkaar!
Kutub beeni ke doran chand sutur par nigah pari, jin ko parh kar yun mehsoos hua ke yeh satren har qalamkaar ke liye mufeed sabit hongi.
Paish karte hain mulahiza farmayen:-
”Jab aap aik achay likhari ban'nay ja rahay hain to is ke liye yehi kaafi nahi ke aap ki to shaya ho rahi hai. Yeh bhi zaroori hai ke aap ki tehreer parhi bhi jaye. Aap ne dekha hoga ke baaz akhbarat kisi makhsoos column ki wajah se khareeday jatay hain. Qarieen ka bara halqa akhbar ya risala khareed kar poora akhbar ya risala nahi parhta balkay apni pasand ke column nigar ka column parhta hai.
Apni tehreer ko parhnay ke qabil bananay ke liye aap ko apni tehreer mein dil chaspi aur asar pazeeri ki khoobian paida karne ka fun aana chahiye warna aap ki tehreer shayad khoobsoorat ho, shaya bhi ho jaye lekin parhi nahi jaye gi. Aap qalamkaar to ban jayen ge lekin kamyaab qalamkaar ban'nay se reh jayen ge. Lehaza yeh jaanna aur samajhna nihayat zaroori hai ke mehez apne khayalat ko alfaaz mein muntaqil kar dene ka naam tehreer nahi hai. Aap ki tehreer aur tasneef aap ko is waqt kamyaab ahl-e-qalam ki saf mein khara kare gi jab aap ki tehreer mein darj zail chhe khoobian mojood hon:
1- Tehreeri lawazim 2- Mauzoo se munasibat 3- Wazahat
4- Maqsadiaat 5- Ikhtisaar o jamiaat 6- Mukammal baat“
(Iqtibas: Likhna Seekhiye az Mufti Abu Lubaba Shah Mansoor safha 116)