Sabr o himmat hausla hai dost tu
Mere zakhmo ki dawa hai dost tu
Koi agar mujhse yeh sawal kare ke tum ne social media se kya paya...?
To mein use bataungi ke mein ne social media se ek aisi mukhlis dost ko paya jis ke saath mein ne hansi mazaaq se le kar ilm seekhne tak ka safar kiya hai jis ke saath reh kar mein ne bohat kuch seekha, jo is farebi aur matlabi dunya mein bina kisi maqsad, baghair kisi mafaad ke mere saath hai, jo mere saath had darja mukhlis hai jis ne mere har dard ko baanta, jo meri hamdard aur ghamgusaar hai, jo meri humraaz hai, jis ne meri pareshani ko apni pareshani samjha jis ne mujhe mushkil waqton mein sambhala, mujhe himmat di hausla diya sabr ki talqeen ki aur mere saath khari rahi, duayen bhi ki, dilase bhi diye aur amli madad bhi ki `jo mujhe khud se bhi zyada azeez hai` 🌹jis ke lafzon se mujhe tasalli milti hai jis ke jumlon se mujhe taskeen milti hai, jis ke saath ghanton baat karna bhi mujhe boring nahi lagta, jo deen ke raaste par bhi meri rehnumai karne wali hai aur dunyavi mamlaat mein bhi meri muavin o madadgaar hai, jis ki narazgi mere poore din ko kharab kar sakti hai aur jo har dil mein ghar karne wali hai.
Kehne ko to hamara talluq bas itna hai ke kuch saalon ki dosti hai aur chand ghanton ki mulaqat lekin ehsaas itna gehra ke saath hansna saath rona hota hai hum mein se ek pareshan ho to dusri bhi us ki takleef ko mehsoos karti hai, jo har mauqe par meri himmat aur mera hausla bani hai, jo meri khushiyon mein bhi barabar ki shareek rahi.
Hamara rishta waqt aur mulaqat ka mohtaaj nahi hai yeh khalis ehsaas ka rishta hai, yeh rooh ka rishta hai.
Aur is munafiqat bhari dunya mein aise kisi mukhlis aur mushfiq insaan ka dost ki shakal mein mil jana kisi nemat se kam nahi hai🌸✨
Kuch ehsaan lafzon se ada nahi hote woh ehsaas ki gehrai mein utar jaate hain is ke liye shukriya lafz bohat chota lagne lagta hai lekin phir bhi ek shukriya to banta hai.
`Shukriya meri pyari dost har lamhe mujhe yeh ehsaas dilane ke liye ke tum mere saath ho`🥹🫂
Meri dua hai Allah hamari dosti ko hamesha qaim o daim rakhe Allah meri dost ko dunya o aakhirat ki bhalaiyan naseeb kare dunya ki zindagi bhi pursukoon aur khushgawar ho aur aakhirat mein bhi jannat ke baghon ki haqdaar ho.
Allah ise zindagi ke har maidan mein kamyabiyan ata farmaye ــــــ Ameen ya rabbul aalameen🤲🏻
T🫶🏻A