استاذ محترم کی خدمت اور ہمارے تأثرات 
ـــــــــــــــــــــــــــــــــــــــــــــــــــــــــ
✍🏻Gul Riza Rahi Arariawi 
ـــــــــــــــــــــــــــــــــــــــــــــــــــــــــ

Qasba Hasanpur ka naam mere kaano mein us waqt takraya jab Raqim Jamia Islamia Arabia Jama Masjid Amroha ke andar Arabi Chaharum mein zer-e-taleem tha, Saal Chaharum wahan ka pehla taleemi saal tha, isliye atraaf ke ilaqe ki malumaat na hone ke darje mein thi-

 Salana tatil ho chuki thi aur baaz ahbab rakht-e-safar bandh rahe the unhi mein kuch ahbab woh bhi the jo keh rahe the ke hum Hasanpur ja rahe hain, shuneed ke wahan taleemi mahol behtar aur yaksoi ke saath faraham hota hai, tulba kisi ustaad ki nigrani mein khoob mehnat karte hain, takrar-o-mutala hota hai, zauq-o-shauq aur khoob raghbat dilai jati hai, duayen khoob hoti hain, itna suna tha bas, phir Raqim ghar chala gaya aur kuch sathi yahan (Hasanpur) aa gaye -

Jab Raqim Eid baad Deoband pahuncha toh dekha ke woh tamam sathi pur aetmad hain, imtehan hua aur phir bohat se sathiyon ka Darul Uloom Deoband mein dakhla hogaya-

Mera naam nahi aaya toh mein apne sabiq madrasay ka rukh kiya aur Saal Panjum pura kiya aur khwahish thi imtehan dakhla doon, magar kuch alalat aur saath hi dasween imtehan ki tareekh nikal aayi aur jis ki wajah se imtehan dakhla se mahroom raha-

 Imsal shuru mein hi mein ne walida majida ko yeh aagahi de di thi ke is martaba Ramzan mein aap ke saath nahi guzaronga, walida ko tafsilat se mutala kar diya toh goya hui ke koi baat nahi -

Khair Saal Haftam rasman wa riwayatan pura hua toh ustaad muhtaram Hazrat Maulana Mujtaba Sahib Qasmi Damat Barkatuhumul Aalia (Muhtamim Jamia Darussalam Hasanpur Amroha) se rabta kiya aur Darul Uloom mein dakhla ki tayyari ke liye aane ki khwahish zahir ki toh Hazrat ne pandrah Shaban ko aane ki ijazat marhamat farmai, phir chutti ke chand roz baad Hasanpur farokash hua-

Ibtida toh yahan kuch dushwarian hui magar rafta rafta aadat ban gai toh ab dushwarian mehsoos nahi hone lagi, chunke Maulana yahan dil lagane mein bhi mahir aur tulba ki nafsiat ko behtar samajhte hain, lehaza shuru shuru mein gasht waghera ki rukhsat di, phir dil lagne ke baad taleemi sargarmi mukammal taur shuru hogai, baaz ghair mutawwal kitabon ke asbaq shuru kar diye, takrar-o-mutala ka paband bana diya gaya, taleem mein sakhti thi, ziya-e-auqat se mana karte the, aur jid-o-jehad ki raghbat dilate rehte the, taleem mein koi ro riayat nahi, magar tulba ke deegar mamlaat mein nihayat narm dil, aur khush mizaj the -
Hum tulba yahan pe dedh mah qayam pazir rahe, is daurania mein bohat kuch dekha suna, padha likha aur samjha bujha -
Taleem-o-tarbiyat, tawakkul alallah, sabr-o-istiqamat khud dari wa qanaat pasandi, tilawat, ibadat wa riyazat, aurad-o-wazaif tawazu-o-aajzi, bahami ittehad-o-ittefaq, isar alan nafs aur khidmat ka jazba karne aur dekhne ka mauqa mila yeh aasan kaam nahi tha, magar Allah Taala ki madad aur Maulana ki sai-e-paiham se yeh mumkin ho paya -

Ramzan mein tayyari karne wale tulba alag alag idare wa ilaqe ke hote hain aur is idare ke bhi tulba hote hain magar Maulana sab ke saath yaksaniat ka mamla farmate balkeh baaz dafa qadeem tulba par sakhti karte aur jadeed tulba ko narmi se samjha dete -

Hum tulba ajnabi the, ek dusre se na aashna the, phir muwakhat qayam hogaya aur sab ek dusre ke muawin ban gaye -

Maulana ne humen apne bachon ki tarah rakha, baap ki kami mehsoos nahi hone di, mehmanon ki tarah mezbani ki, apni aulad samajh kar hamari khidmat ki aur zarurat ki cheezon se humen azaad rakha, khud tag-o-dau karte aur phir waqt par aakar hashash bashash hoke sabaq padhate, tafrihi jumla irshad karke majlis dars ko lala zar farmate, jis se Sharh Aqaid jaisi mushkil kitab aasani ke saath samajh aa jati, waqt mein barkat ka yeh aalam tha ke Sharh Aqaid jaisi kitab ke dhai teen safhe ba aasani hojati
 -

Hattal wasa Maulana apni zaruraton par tulba ki zarurat ko muqaddam rakhte, aur behtar se behtar intezam karne ki koshish karte, duaaon ka ehtemam khud bhi farmate aur tulba ko bhi aamada karte-

 Al gharz! Maulana ne woh tamam koshishen ki jo hamare aur dakhle ke haq mein mufid wa behtar ho sakti thi -

Ramzan mein bil umum duaaon ka ehtemam bator-e-khas hamare imtehan mein kamyabi ke liye, phir Eid ke mauqe par tulba ko yeh mehsoos na ho ke hum ghar se door hain, behtar se behtar khane peene ka nazm, kai tarah ke pakwan tayar karaye gaye, dawaten keen aur hum sab lutf andoz hue, is ke baad eidi bhi inayat farmai, is tarah farakh dili ka muzahira karte hue meri aankhon ne kabhi nahi dekha, ek arsa baad mujhe eidi mili thi chunke hum bade gaye is liye rishtedaron ne eidi dena chhod diya, magar Maulana ki zarra nawazi ke unhon ne humen eidi de kar yeh ehsas dilaya ke tum mere ruhani bete ho, aur yeh tumhara haq hai, is se qalbi musarrat hui aur duayen bhi nikli, yeh khushi bator-e-khas un tulba ke liye zyada ahem hai jin ke sar se walid ka saya uth gaya, aur yeh dukh mujh se behtar aur kaun samajh sakta hai -

Bahar haal! Maulana ki purkhuloos khidmat aur tulba ke tai humdardi wa mohabbat misali aur jazba bilali hai jo aaj kal unqa hai -

Allah Taala Hazrat Wala ki khidmaat ko qubool farmaye aur unke azayem aur hamari tamannaon ko ba murad banaye, hum sab ko Hazrat Al Ustaad ke nuqoosh ko mazeed aage le jane ki toufeeq ata farmaye
Jamia Darussalam ko khoob tarqiyat se nawaze-
 Aameen Summa Aameen