Saliqay se hawaon mein woh khushbu ghol sakte hain
Abhi kuch log baqi hain jo Urdu bol sakte hain
Mohtaram Qarieen! Urdu bar-e-saghir Pak-o-Hind ki meyari zubanon mein se aik hai. Yeh Pakistan ki qaumi aur rabta-e-aama ki zuban hai. Jabke Bharat ki chhe riyasaton ki daftari zuban ka darja rakhti hai. 2001ء ki mardum shumari ke mutabiq Urdu ko bator-e-madri zuban Bharat mein 5.01 feesad log bolte hain aur is lihaaz se yeh Bharat ki chhatti bari zuban hai. Jabke Pakistan mein ise bator-e-madri zuban 9.25 feesad log istemal karte hain. Yeh Pakistan ki panchwin bari zuban hai. Zuban Urdu ko pehchan wa taraqi is waqt mili jab Bartanwi daur mein Angrez hukmaranon ne ise Farsi ke bajaye Angrezi ke sath Shumali Hindustan bator-e-daftari zuban nafiz kiya. Syed Suleman Nadvi likhte hain:
"Urdu zuban ka paida hona kisi aik qaum ya quwat ka kaam nahi balkeh yeh mukhtalif qaumon aur zubanon ke mail jol ka na-guzir aur lazmi nateeja hai"
Hindustan bhar mein Urdu zuban ki ahmiyat aur afadiyat ka andaza is baat se lagaya ja sakta hai ke Angrezon ne apne ahlkaron ko Urdu zuban sikhane ke liye 1820ء mein London mein aik college idara Sharafia qaim kiya jabke 1800ء mein Fort William College Kolkata ka qayam bhi isi gharz-o-ghayat se amal mein laya gaya tha. Professor Ranga likhte hain:
"Urdu aik tehzeebi zuban hai is ko barqarar rakhna chahiye yeh dastoor ki chaudah zubanon mein se aik hai"
Mahatma Gandhi ne kaha hai:
"Mein Urdu ki taraqi chahta hun mera khayal hai ke sab Hindustani Urdu seekhen"
Urdu zuban ko char chand lagane mein shairon, adibon, mufakkiron, ulama akhbarat, radio, aur Kashmir waghera ne zabardast kirdar ada kiya hai aur kar rahe hain.
Aur ulama karam ne is zuban ko tadabbur aur sainastagi se muzayyan kiya hai.