Faisla Bihar ka 14 November ki subah ka intezar
✍🏻Khama Bakaf Muhammad Aadil Arariavi
-------------------------------------------------
Mohtaram Qarain, Bihar ki fizaon mein is waqt ek ajab sa sukoon bhi hai aur ek anjana sa josh bhi. Voting mukammal ho chuki hai, awam ne apni zimmedari nibha di hai. Gaon se le kar shehron tak, buzurgon se le kar naujawano tak, har hath mein umeed ka chirag tha, har nigah mein behtar kal ka khwab. Ab sab ki nazren 14 November par tiki hain. Woh din jab sandooqon mein band awam ki awaz faisla ban kar samne aayegi. Kahin dil mein umeed ke phool khil rahe hain to kahin bechaini ke badal chhaye hain. Har siyasi camp mein sargoshiyan hain, chehron par muskurahat bhi hai aur tashweesh ke saye bhi. Yeh waqt awam ke sabr ka hai, jamhuriyat ke husn ka hai. Kyunki vote dene ke baad awam ka farz khatam nahi hota, balki un ki nigah ab is faisle par rehti hai jo un ke mustaqbil ka rukh tay karega.
14 November ko sirf nateeja nahi aayega, balki Bihar ki ek nai subah tuloo hogi. Khwah woh kisi ke liye khushi ki ho ya kisi ke liye sabaq ki, magar ek baat tay hai, Bihar ne ek bar phir apni jamhoori rooh ko zinda rakha hai aur yahi sab se badi jeet hai.
Aye Allah Rabb-ul-Izzat, Bihar ke is faisle mein haq aur insaaf ka bol bala farma. Jis ke hath mein awam ki bhalai ho, use kamyabi ata kar aur hamare soobe ko aman o taraqqi aur yakjehti ki rahon par gamzan farma.
Aameen Ya Rabb-al-Aalameen.