Aik Mutalqa Ki Sada (A Divorced Woman's Voice): Mera Mehar Le Lo, Mera Shabab Lauta Do (Take my dowry, return my youth)
Woh jab aayi thi, tou uss ke aanchal mein hazaron khawab thay, aankhon mein sitare thay aur chehre par woh shokhi thi jo sirf befikr betiyon ke hisse mein aati hai, uss ne apna ghar chora, apni pehchan chori, aur aik aise shakhs ke sapurd ho gayi jis ne usse Amanat samajhne ke bajaye Khel samajh liya. Barson uss ki khidmat mein guzar diye, apni khushiyan uss ki thakan par qurban keen, uss ke ghar ko ghar banane mein apni haddiyan pighla deen, aur jab waqt ne uss ke chehre par thakan ki lakeeren khencheen aur baal chandi kiye, tou uss mard ne bari be niyazi se keh diya jao, mein ne tumhein azad kiya.
Woh aurat jo ab aaine mein khud ko pehchanne se qasir hai, woh jis ne apni jawani uss shakhs ki dehleez par khairat kar di, aaj aik aisa sawal pooch rahi hai jis ka jawab kainat ke kisi qanoon ke paas nahi. Tumhare diye hue mehar ke chand sikke tou mere hath mein hain, lekin woh jawani kahan hai jo tumhare bachon ko paalne mein guzar gayi? Woh muskurahat kahan hai jo tumhari talkhiyon ki nazar ho gayi? Agar tum hisab barabar karna chahte ho, tou mehar ke sath mera woh shabab bhi lauta do jo ab kabhi wapas nahi aayega. Islam ne aurat ko Qawarir (nazuk aabgina) kaha tha, jisse sanbhal kar rakhne ka hukum diya gaya tha, lekin jab aik mard apni taqat ke zaum mein aakar, sharai hudood ko pamal karte hue, kisi masoom ka dil torta hai aur usse be sahara chorta hai, tou Arsh-e-Ilahi laraz uthta hai.
Mazloom Ki Aah Aur Allah Ka Insaf (The Sigh of the Oppressed and Allah's Justice)
Rasool Allah ﷺ ne farmaya: Mazloom ki baddua se bacho, kyunke uss ke aur Allah ke darmiyan koi parda nahi hota, (Bukhari). Jab aik talaq yafta aurat raat ki tanhai mein apne zaya shuda barson ka hisab Allah ke samne rakhti hai, tou uss zalim mard ki pakar shuru ho jati hai, dunya mein shayad woh dusri shadi kar le, shayad woh khush nazar aaye, lekin Allah ki laathi be awaz hai.
Quran-e-Kareem mein irshad hai ke auraton ko bhale tareeqe se rakho ya ehsan ke sath rukhsat karo, jo mard sharai hudood tor kar, apni ana ki khatir ya kisi mamooli baat par zindagi bhar ka sath jhatke se khatam kar dete hain, woh qayamat ke din Allah ke samne Ghadar (dhoke baz) ban kar khare hon ge. Tareekh gawah hai ke jo shakhs kisi ki beti ya behan ka ghar ujarta hai, uss ke apne ghar ka sukoon cheen liya jata hai, uss ka anjam tanhai, zillat aur aisi be barkati hoti hai ke woh sab kuch hote hue bhi sukoon ko tarasta hai.
Talaq sirf aik nikah ka tootna nahi hai, yeh aik insan ke maan ka tootna hai, mehar tou mehez aik raqam hai, lekin uss aurat ka woh waqt, woh ehsasat aur woh jawani jo uss ne aik zalim ke naam ki, uss ka badla sirf Allah hi de sakta hai, woh shakhs kabhi kamyab nahi ho sakta jis ne kisi ke aansuon par apni khushi ki bunyad rakhi ho.
✍️Mutallem Al-Jamiatul Ashrafia✍️