🌻E'tikaf-e-Sunnat

E'tikaf-e-Sunnat woh hai jo sirf Ramzan ul Mubarak ke aakhri ashra mein kiya jata hai.

🌻E'tikaf-e-Sunnat ke Masail

[1] Ramzan ke Sunnat E'tikaf ka waqt beeswan roza pura hone ke din ghuroob-e-aftab se shuru hota hai aur Eid ka chand nazar aane tak rehta hai. Mo'takif ko chahiye ke woh beeswein din ghuroob-e-aftab se pehle E'tikaf wali jagah pahunch jaye.

[2] Yeh E'tikaf Sunnat-e-Mu'akkadah Alal Kifayah hai, yani bade shehron ke muhalle ki kisi ek masjid mein aur gaaon dehat ki puri basti ki kisi ek masjid mein koi ek aadmi bhi E'tikaf karega toh Sunnat sab ki taraf se ada ho jayegi. Agar koi bhi E'tikaf na kare toh sab gunahgar honge.

[3] Jis muhalle ya basti mein E'tikaf kiya gaya hai, us muhalle aur basti walon ki taraf se Sunnat ada ho jayegi agarche E'tikaf karne wala dusre muhalle ka ho.

[4] Aakhri ashre ke chand din ka E'tikaf, E'tikaf-e-Nafl hai, Sunnat nahi.

[5] Aurton ko masjid ke bajaye apne ghar mein E'tikaf karna chahiye.

[6] Sunnat E'tikaf ki dil mein itni niyat kafi hai ke mein Allah Ta'ala ki raza ke liye Ramzan ke aakhri ashre ka masnoon E'tikaf karta hun.

[7] Kisi shakhs ko ujrat de kar E'tikaf bithana jaiz nahi.

[8] Masjid mein ek se zaid log E'tikaf karein toh sab ko sawab milta hai.

[9] Masnoon E'tikaf ki niyat bees tareekh ke ghuroob-e-shams se pehle kar leni chahiye, agar koi shakhs waqt par masjid mein dakhil ho gaya lekin usne E'tikaf ki niyat nahi ki aur suraj ghuroob ho gaya toh phir niyat karne se E'tikaf Sunnat nahi ho ga.

[10] E'tikaf-e-Masnoon ke sahih hone ke liye mandarjah zail cheezein zaroori hain

1) Musalman hona
2) Aaqil hona
3) E'tikaf ki niyat karna
4) Mard ka masjid mein E'tikaf karna
5) Mard aur aurat ka janabat yani ghusl wajib hone wali halat se paak hona. Yeh shart E'tikaf ke jaiz hone ke liye hai lehaza agar koi shakhs halat-e-janabat mein E'tikaf shuru kar de toh E'tikaf toh sahih ho jayega lekin yeh shakhs gunahgar ho ga.
6) Aurat ka haiz o nifas se khali hona
7) Rozay se hona. Agar E'tikaf ke dauran koi ek roza na rakh sake ya kisi wajah se roza toot jaye toh masnoon E'tikaf bhi toot jayega.

[11] Agar kisi shakhs ne pehle do ashron mein rozay na rakhe hon ya tarawih na padhi ho toh woh bhi E'tikaf kar sakta hai.

[12] Jis shakhs ke badan se badboo aati ho ya aisa marz ho jis ki wajah se log tang hote hon toh aisa shakhs E'tikaf mein na baithe albatta agar badboo thodi ho jo khushboo waghera se door hojaye aur logon ko takleef na ho, toh jaiz hai.

📚E'tikaf Course Safha 19-21