Shahzadon ka Imtehan

🥰

*Shehzadon Ka Imtehan* 

*(Bachon ke liye dilchasp, hairat angez aur sabaq amoz kahani)*

*Qist Number 11*

 *Bahadur Shehzada Rabeel Ki Qaid Mein* 

Makkar Ilchi ka paigham sun kar Bahadur Shehzada gehri soch mein doob gaya tha. Jadugaron ke muqable ke liye usay koi tadbeer nahi soojh rahi thi. Us ne Ilchi ko agle din aane ke liye kaha. Ilchi ek dum ghayab ho gaya. Ab Shehzade ne tamam bastiyon se apne musheeron ko bulwa bheja. Jab sab ikathe ho gaye to us ne sari baat un ko bata di. Woh puri raat is masle ka hal sochte rahe. Aakhir faisla hua ke hum chup chap shikast nahi manenge aur jadugaron ka muqabla karne ki koshish karenge.

Dusre din wohi Ilchi phir aa gaya. Shehzade ne usay apna faisla suna diya aur woh usi waqt dhamkiyan deta hua wapas chala gaya. Is ke jaane ke baad Shehzade ne apni fauj ko us khas maidan mein jama kiya jis ke charon taraf seedhiyon ki shakal mein baithne ke liye nasheesten maujood theen. Yeh bahut bada maidan tha, jis tarah aaj kal cricket ke liye stadium hote hain. Is jagah Shehzada apni fauj ko mashqen karata tha aur mele waghera lagte, jin mein sari bastiyon ke log hissa lete. Shehzade ne apni fauj ko jang ki hikmat e amli samjhane ke liye ikatha kiya tha, magar is ki yeh aarzoo puri na ho saki. Achanak hi sare aasman par siyah badal cha gaye aur rangeen barish shuru ho gayi. Un ki nazren aasman ki taraf utheen aur phir sab log patthar ke butt ban gaye. Kisi ko hilne ka mauqa tak na mil saka.

Rabeel ne Ilchi ke paigham ke baad budhe jadugar ko usi waqt hamla karne ka hukm de diya. Us ne Shehzade ko sanbhalne ka mauqa tak na diya tha. Jadugaron ki puri fauj darya ke paar ki bastiyon par qabza karne ke liye rawana ho gayi. Pehle to jadugaron ne fiza mein masnui badal banaye, phir insano ko patthar mein tabdeel karne wali rangeen barish barsai. Is ke baraste hi log patthar mein tabdeel ho gaye aur tamam bastiyon par Rabeel jadugar ka qabza ho gaya. Rabeel ne makkar jadugar ki madad se Bahadur Shehzade ko pehchan kar usay us ke mahal mein qaid kar diya aur do jadugaron ko pehre ke liye khada kar diya gaya. Is ke baad jadugaron ne mukhtalif amal kar ke logon ke zehnon ko apne qaboo mein karna shuru kar diya. Ek din ke baad jab sab logon ko dobara hosh aaya to woh puri tarah Rabeel aur is ke jadugaron ke ghulam ban chuke the.

 *Reham Dil Shehzade Ki Maut* 

Reham Dil Shehzade ko hosh aaya to woh ek aaram deh bistar par leta hua tha. Kamra bhi intehai shandar andaz mein saja hua tha. Pata nahi kitne din woh behoshi ki halat mein raha. Guzre hue waqiat ek ek kar ke usay yaad aane lage to woh uth kar baith gaya. Talwar abhi tak us ke hath mein thi. Shehzade ke uth kar baithte hi ek jadugar andar aaya aur Shehzade ko zinda salamat Rabeel ke mahal mein wapas aane par mubarak baad di. Shehzade ka zehen jaag chuka tha. Usay buzurg ki baaten yaad aane lageen. Unhon ne Rabeel ko qatal karne ka hukm diya tha. Shehzade ko gum sum dekh kar jadugar kehne laga ke aap ko Rabeel yaad kar rahe hain, woh bahut khush hain.

Shehzada tayar ho kar Rabeel ke paas pahunch gaya. Rabeel ne kamyabi par Shehzade ki tareef ki aur jald hi usay inaam dene ka wada kiya. Us ne Shehzade ko apni nayi saltanat dekhne ki dawat di aur tayar rehne ka hukm diya. Agle din subah ke waqt un ka qafila tayar ho gaya. Sab log jadui ghodon par sawar the. Sab se aage Rabeel ka ghoda tha. Jadui ghode hawa mein udte hue darya ki simt jane lage. Darya paar karne ke baad woh khuli zameen par utar aaye aur ek jaisi raftaar se bastiyon mein se guzarne lage, jahan makan bade saleeqe se qitaron ki shakal mein bane hue the.

Shehzada badi dilchaspi se makanon ki qitaron ko dekh raha tha. Har ghar ke samne se pani ki do patli patli nehren guzar rahi theen. Ek nehar jo nisbatan bulandi par thi, is mein saaf shaffaf pani tha. Dusri nehar kuch pasti mein thi. Is mein gharon ka istemal shuda pani guzar kar na jane kahan ja raha tha. Yeh bal khati nehren tamam aabadiyon mein tasalsul ke sath rawan dawan nazar aaeen. Shehzade ka tajassus badhta ja raha tha. Woh dekhna chahta tha ke yeh itna ziyada pani kahan se aata hai aur kahan ghayab hota hai? Lekin us ka yeh tajassus abhi mazeed imtehan chahta tha. Jab qafila bhari aabadi ke darmiyan pahuncha to achanak gehrai mein ek bada jadeed tarz ka maidan aa gaya. Yeh bahut bada gol daire ki shakal ka maidan tha, jis ke charon taraf seedhiyon ki soorat mein baithne ke liye aaram deh nasheesten maujood theen.
Rabeel ke pahunchne ki ittila pehle hi se yahan pahunch chuki thi. Us ke liye alag se ek takht bichhaya gaya tha. Qafile ke pahunchte hi har taraf se logon ki aamad shuru ho gayi aur chand lamhon mein sara maidan khacha khach bhar gaya. Rabeel shahana chaal chalta hua takht ki taraf badh gaya. Shehzada takht ke qareeb padi kursiyon mein se ek kursi par baith gaya. Jab sab log baith gaye to fiza mein phuljhadiyan si phailne lageen. Tamam logon ki nigahen aasman ki taraf uthi hui theen. Shehzada bhi hairat se aasman par phailti roshni aur rangon ko dekh raha tha. Roshni aahista aahista badhne lagi. Jab yeh roshni maidan ke bilkul upar pahunchi to is mein udte hue jadugar nazar aane lage. Woh badi tezi se zameen ki taraf aa rahe the. Logon ne khade ho kar taliyan bajani shuru kar deen. Naujawan naare lagane lage aur dhol bajne ke sath moseeqi ki tez aawazen badhne lageen. Agle hi lamhe udne wale jadugar takht ke samne utar gaye. Unhon ne jhuk kar Rabeel ko salami di aur apni zuban mein kuch badbadane lage. In logon ki tadaad bhi ziyada thi. Rabeel ne apna bayan hath buland kiya to yeh jadugar badbadate hue takht ke charon taraf phail gaye. Unhon ne apne apne hath fiza mein buland kiye, jaise wahan se koi cheez pakadna chahte hon. Baghair kisi der ke sab ke hathon mein chamak dar barchhiyan nazar aane lageen. In barchhiyon ki noken itni tez theen ke din ke ujale mein bhi un ki chamak nazar aa rahi thi. Unhon ne barchhiyon ko daire mein ghmana shuru kar diya. Sath sath woh khud bhi ek ghoomte daire ki tarah chakkar laga rahe the. Woh itni tezi se ghoom rahe the ke un par nazar tak na theharti thi. Phir achanak dhamakon ki aawazon se maidan goonj utha. Jadugar dobara fiza mein buland hue aur aasman par jaal sa phailta nazar aaya, phir us mein se rassiyan kat kat kar maidan ki taraf aane lageen. Maidan mein sannata cha chuka tha. Logon ke jism rassiyon mein lipatne lage, lekin kisi ne koi muzahmat na ki. Shehzade par bhi bahut sari rassiyan gireen. In rassiyon se bheeni bheeni mehak uth rahi thi, jis se dimagh bojhal hota ja raha tha. Dusron ki dekha dekhi Shehzade ne bhi apne upar padi rassiyan hatane ki koshish na ki. Rassiyon ke baad pani ki tez phuwar jari hone lagi, jaise barish aati hai. Jahan jahan yeh phuwar padti gayi, wahan se rassiyan ghayab hone lageen. Pani ki phuwar mein har rang shamil tha. Ajeeb baat yeh thi ke is pani se maidan zara bhi geela na hua aur na koi aadmi is se bheega. Bas sari rassiyan ghayab ho gaeen. Phir jadugar neeche aane lage. Shehzada gaur se un ki janib dekh raha tha. Jab woh zameen par aaye to adab se Rabeel ke samne jhuk gaye. Shehzade ne charon taraf dekha lekin logon ki nigahen abhi tak aasman ki taraf hi theen, jahan kuch bhi na tha. Shehzade ke harkat karte hi jadugaron mein tehelka mach gaya. Woh unchi aawaz mein cheekhne lage. Shehzade ne aas paas dekha to tamam log patthar ke butt bane nazar aaye. Us ne apne sath baithe aadmi ko chhua to us ka upar ka saans upar aur neeche ka neeche reh gaya. Woh aadmi patthar ban chuka tha. Sirf Rabeel aur Shehzada apni asal halat mein the. Rabeel ke chehre par ghaiz o ghazab ke aasar nazar aane lage. Us ne Shehzade ko harkat karte dekh liya tha. Talwar ki wajah se jadugaron ka jadu Shehzade par nahi chal saka tha. Achanak Rabeel uth kar khada ho gaya aur udne wale us ke gird jama ho gaye. Shehzada bhi khada ho chuka tha aur us ke dimagh mein khatre ki ghantiyan bajne lagi theen. Bahut pehle ek najoomi ne Rabeel ko bataya tha ke tumhari maut ek naujawan Shehzade ke hathon ho gi. Tum khud usay apne paas bulao ge aur tumhara jadu us par koi asar nahi karega. Is waqt Rabeel ko woh pesh goi yaad aa gayi. Us ne ghusse mein aa kar jadugaron ko Shehzade par hamla karne ka hukm de diya. Woh barchhiyan le kar Shehzade ki taraf badhe. Khauf ki wajah se Shehzade ko ek sard lehar apni reedh ki haddi mein utarti hui mehsoos hui. Usay maut apne samne khadi nazar aa rahi thi

 *Tilasmi Aaina* 

Tilasmi Aaina Aqal Mand Shehzade ke samne rakha tha. Hazim Jin ne adab se kaha:
"Huzoor! Aap is mein kya dekhna chahte hain?"

Shehzade ne kaha:
"Mein apne bhai, Reham Dil Shehzade ko dekhna chahta hun. Woh ab kis jagah aur kis haal mein hai?"

Isi waqt aaine mein roshni phailne lagi aur mukhtalif rangon ki shuaen zahir hone lageen. Phir ek maidan ka manzar ubhra jahan Reham Dil Shehzada bahut se patthar ke button ke darmiyan khada tha aur kuch log barchhiyan le kar us ki taraf badh rahe the. Yeh dekh kar Aqal Mand Shehzada pareshan ho gaya. Us ne Hazim Jin ko hukm diya:
"Hazim! Foran kuch karo aur mere bhai ko in dushmanon se bachao!"

Hazim Jin ne kuch padh kar tilasmi aaine par phoonk mari to Reham Dil Shehzade ke gird sabz shuaon ka ek hisaar khinch gaya. Isi waqt barchhiyan chaleen lekin un ka ulta asar hua. Barchhiyan wapas hueen aur usi raftaar se jadugaron ke seenon ko cherti hui dusri janib se nikal gaeen. Woh waheen gir kar tadapne lage. Yeh manzar dekh kar takht par baitha hua aadmi uth kar khada ho gaya tha aur Reham Dil Shehzada phati phati aankhon se sab kuch dekh raha tha.

"Yeh sab kya ho raha hai, Hazim? Apne ilm se is waqt pata lagao!" Aqal Mand Shehzade ne Hazim ko hukm diya to woh munh hi munh mein kuch padhne laga. Phir us ne kaha:
"Aap fikar na karen, aap ka yeh bhai salamat rahe ga aur bhagne wala jadugar isi Shehzade ke hathon apne anjam tak pahunche ga, kyun ke zalimon ka anjam hamesha bura hota hai. Jo dusron ke liye garha khodta hai, ek din woh khud is mein zaroor girta hai."

*Jari hai ۔۔۔۔////*
🌹🌸♥️🌼