*"Masjid-e-Rasheed" Mein Ramzan Ka Dusra Juma*
Ba-qalam: Muaz Haider
9/ Ramzan 1447 Hijri
Darul Uloom Deoband Ki Masajid Mein *"Masjid-e-Rasheed"* Sab Se Badi Aur Nihayat Hi Khoobsurat Hai, Is Ki Tameer Wasee O Areez Raqbe Par Hui Hai, Is Ki Har Cheez Anokhi Hai, Mashriqi Janib Ek Kushada Sehan Hai, Jahan Se Masjid Ka Haseen Manzar Nigahon Ko Mas-hoor Kar Deta Hai, Woh Nazara Waqai Dil Fareb Hota Hai.
Is Diyar Mein Allah Ta'ala Ne Ajeeb Jazbiyat Rakhi Hai, Yahan Ek Maqnateesi Kashish Aur Ghair Mamooli Khichao Mehsoos Hota Hai, Is Haram Ki Ziyarat Ke Baad Dil Be-qaboo Sa Ho Jata Hai, Qasawat Mitne Lagti Hai, Riqqat Paida Ho Jati Hai, Jo Yahan Aata Hai Hamesha Ke Liye Is Ka Aseer Ban Jata Hai.
Aaj Juma Ka Din Tha, Namaz Ki Adaigi Ke Liye *"Masjid-e-Rasheed"* Pohancha To Ek Alag Hi Manzar Dekhne Ko Mila, Waqt Se Pehle Hi "Pehli Manzil" Pur Ho Chuki Thi, "Dusri Manzil" Par Pohancha To Wahan Bhi Pair Rakhne Ki Jagah Nahi Thi, Musalmano Ka Ek Sailab Umad Aaya Tha, Zameen Tangi Ki Shikayat Kar Rahi Thi, Ba-mushkil Sehan Mein Jagah Naseeb Hui.
Riqqat Amez Mahol Tha, Har Gosha Namaziyon Se Bhara Hua Tha, Ruhaniyat Apne Urooj Par Thi, *Mufti Affan Sahab Mansoorpuri -Damat Barkatuhum-* Ki Khush Ilhani Se Dil Phatne Ke Qareeb Tha, Bail Boote Bhi Goya Sar Mila Rahe The, Dil Ki Gandagiyan Saaf Hoti Mehsoos Ho Rahi Thin, Aankhen Be-qaboo Thin Aur Ashk Rawan Tha, Jism Ka Har Zarra Mutasir Tha, Har Uzv Zaban-e-Haal Se Yahi Keh Raha Tha:
"Ae Allah! Ikhlas Ke Is Taj Mahal Ko Baqi Rakhiye, Aur Is Majma Ki Barkat Se Hamari Kotahiyon Ko Darguzar Farma Dijiye."
Namaz Ke Baad Jab Mashriqi Darwaze Se Bahar Nikla To Chand Baradaran-e-Watan Ko Musalliyon Ke Istiqbal Mein Khada Paya, Woh Phoolon Ke Zariye Apni Muhabbat Ka Izhar Kar Rahe The, Yeh Manzar Dekh Kar Khushi Hui, Har Simt Hifazati Dasta Maujood Tha, Hukoomati Amla Har Darwaze Par Nigrani Kar Raha Tha.
Yeh Mera Pehla Tajurba Tha, Har Cheez Nai Maloom Ho Rahi Thi, Bila Shubha Deoband Ka Ramzan Yahan Ke Baqiya Giyarah Mahino Se Bilkul Judagana Kaifiyat Rakhta Hai.