Ramzan ul Mubarak Allah Ta'ala ki taraf se ata karda woh azeem ne'mat hai jis mein banda-e-momin ke liye hidayat, rehmat, maghfirat aur nijaat ke darwaze khol diye jate hain. Yehi woh mahina hai jis mein Quran-e-Majeed nazil hua, jis ne insaniyat ko andheron se nikal kar noor ki taraf rehnumai ata ki. Ramzan ki khusoosiyat yeh hai ke is mein din ke waqt roza farz kiya gaya aur raaton ko qiyam ki azeem ibadat ata farmai gai, jise hum Namaz-e-Tarawih ke naam se jante hain.
Namaz-e-Tarawih darhaqiqat Qiyam-e-Ramzan hai, jis ki fazeelat Nabi Kareem Sallallahu Alaihi Wasallam ne nihayat wazeh andaz mein bayan farmai. Hadees-e-Mubaraka ke mutabiq jo shakhs iman aur sawab ki niyat se Ramzan ki raaton mein qiyam karta hai, Allah Ta'ala us ke sabqa gunahon ko maaf farma deta hai. Yeh bisharat is baat ki daleel hai ke Tarawih mehz aik izafi ibadat nahi balkeh Ramzan ki rooh aur maghfirat ka mu'assar zariya hai. Rasool Allah Sallallahu Alaihi Wasallam ne khud is namaz ko ada farmaya aur Sahaba-e-Kiram Raziallahu Anhum ne ise hamesha ehtemam ke sath zinda rakha. Hazrat Umar Farooq Raziallahu Anhu ke daur mein is namaz ka baqaida jamaat ke sath ehtemam kiya gaya, jo ummat ke ijma aur ta'amul se sabit hai.
Ramzan ul Mubarak teen ashron par mushtamil hai. Pehla ashra rehmat ka, doosra ashra maghfirat ka aur teesra ashra jahannam se nijaat ka paigham le kar aata hai. Ab jab hum Ramzan ke doosre ashre mein dakhil hone ja rahe hain to yeh marhala khas taur par ghaur o fikar, tauba o istighfar aur apni islah ka taqaza karta hai. Maghfirat ka mafhoom mehz gunahon ki maafi nahi balkeh Allah Ta'ala ki woh khas inayat hai jis mein bande ke gunah mita diye jate hain, us ke aib chhupa diye jate hain aur ise saza se mehfooz kar liya jata hai. Quran-e-Majeed mein Allah Ta'ala ne gunahgar bandon ko mayoosi se bachate hue wazeh paigham diya hai ke Allah ki rehmat se naumeed na hon, kyunke woh tamam gunahon ko maaf farmane wala hai.
Ashra-e-Maghfirat mein sab se ziyada zor tauba aur istighfar par diya gaya hai. Nabi Kareem Sallallahu Alaihi Wasallam, jo masoom un ul khata the, din mein sattar martaba se ziyada istighfar farmaya karte the. Is se andaza kiya ja sakta hai ke hum jaise khatakar bandon ke liye istighfar ki kitni ziyada zaroorat hai. Yehi ashra hamein dawat deta hai ke hum apne gunahon ka aitraf karein, dil se nadamat mehsoos karein aur aainda zindagi ko durust karne ka pukhta azm karein.
Namaz-e-Tarawih is ashre mein khas ahmiyat rakhti hai, kyunke yeh woh ibadat hai jis mein banda Quran sunta hai, Allah ke samne khara hota hai aur is ka dil narm hota hai. Tarawih darasal maghfirat ki taraf jane wala aik amali rasta hai. Afsos ke aaj ke daur mein bohat se log susti, masroofiyat ya dunyawi mashaghal ko tarjeeh de kar Tarawih ko nazar andaz kar dete hain. Halanke Hadees-e-Mubaraka mein sakht tanbeeh aai hai ke woh shakhs bara mahroom hai jis ne Ramzan paya magar maghfirat hasil na kar saka.
Ramzan ka doosra ashra hamein jhanjhor kar yeh ehsas dilata hai ke yeh mohlat hamesha ke liye nahi. Yeh ratein, yeh qiyam aur yeh mawaqe bar bar nahi aate. Na maloom agla Ramzan naseeb ho ya na ho. Is liye aqal o iman ka taqaza yehi hai ke hum is Ashra-e-Maghfirat ko ghaneemat samjhein, Namaz-e-Tarawih ki pabandi karein, istighfar ko apni zuban ka wird banayein, dilon ki safai karein aur Allah Ta'ala ki taraf sachi tauba ke sath ruju karein.
Agar hum ne is ashre mein Allah Ta'ala ki maghfirat hasil kar li to yehi kamyabi hamari aakhirat ki nijaat ka zariya ban sakti hai. Ramzan hamein yehi paigham deta hai ke banda agar khuloos ke sath Allah ki taraf palat aaye to is ke liye maghfirat, rehmat aur nijaat sab kuch mumkin hai.