Kaash! Main Agar Hota...
Kaash lafz nahi, balkay insani khwahishaat ka woh athaah ka samandar hai jis ne apne andar an-gint tamannaon ko samo rakha hai. Is ki wusat ka aalam yeh hai ke insaan ki tamam adhoori umangein aur be naam hasratein isi aik lafz ke gird tawaaf karti reh jati hain.
Iflaas ki tapti dhoop mein: Kaash! mere paas daulat ki chhaaon hoti.
Bimari ki niqahat mein: Kaash! main sehat o tawanai se malaa maal hota.
Gum-naami ke andheron mein: Kaash! mere naam ka bhi ujaala (shohrat) hota.
Muhtaaji ki zanjeeron mein: Kaash! main khud mukhtaar aur ghani hota.
Iztiraab ke aalam mein: Kaash! mera daaman har gham se khaali hota.
Insaani zindagi ki daud "Kaash" se shuru hoti hai aur isi ki baazgasht par khatam ho jati hai. Lekin lamha-e-fikriya yeh hai ke agar hum ne is faani zindagi mein deen ko apni asaas na banaya aur shariat ki pairwi na ki, to yahi "Kaash" aakhirat mein aik haulnaak pachtawe ki soorat ikhtiyar kar le ga.
Quran-e-Majeed is dardnaak anjaam ki manzar kashi kuch yun karta hai ke jab insaan apni tamam tar dunyawi daud dhoop ko
raaigaan paaye ga, to pukaar uthe ga:
"يَا لَيْتَنِي كُنْتُ تُرَابًا" (Aye Kaash! main mitti hota)
Yeh woh maqaam hoga jahan tamam "Kaash" khatam ho jayen ge aur sirf abdi nadamat reh jaye gi. Is se pehle ke hamari zindagi mehez aik hasrat ban kar reh jaye, hamein "Kaash" ke saraab se nikal kar "amal" ki haqeeqat ko apnana hoga
Az qalam: Za-Sheikh