Hazur-e-Akram (PBUH) ki aankhon mein husn ka aik aisa aalamgeer suroor tha jo dilon ko be-khudi ki lazzat se humkinar kar deta tha. Aap (PBUH) ki nigahon mein mohabbat ki woh latafat aur shafqat ki woh chamak thi jo dekhne wale ke baatin tak utar jati. Yun mehsoos hota goya un aankhon mein kainat ke posheeda raaz simat aye hon, aur woh raaz sirf ahl-e-dil hi par aashkar hote hon.
Aap (PBUH) ki palkon mein aisa jamal tha ke jo bhi aik baar dekh leta, us ki nazar wahin thehar jati. Waqt jaise tham sa jata, dil ki dharkanen madham ho jatin aur rooh aik anjani si tamaniyat mein doob jati
Woh nigah dilon ko sanwarti, roohon ko jagati aur baatin ko roshan kar deti thi.
Woh aankhen ishq ke us rang mein rangi thi goya nigah-e-yaar mein woh deedar-e-Ilahi ka sarapa noor ho, un ki har nazar mein walihana pyar, har junbish mein rehmat, aur har iltifat mein pur sukoon latafat thi. Aisa noor jhalakta tha jo dil ke tareek goshon mein umeed ke chiragh roshan kar deta. Aik lamhe ki nazar se lakhon be chain dilon ko qarar milta, aur woh nigah aaj bhi muztarib roohon ko sukoon ata kar rahi hai.
Aap (PBUH) ki nigah mein woh taseer thi ke mohabbat khud apne aap ko pehchan leti. Dil apna rasta bhool kar usi noor mein gum ho jata. Woh aankhen na sirf zahir ko dekhti thin balkeh baatin ki gehraiyon tak rasai rakhti thin. Insan ki khamosh duayen, an kahi aarzooyen aur posheeda tamannayen, sab us nigah-e-karam mein simat jatin.
Yahi nigah-e-Mustafa (PBUH) ka noor tha jo husn bhi tha, ishq bhi, aur suroor bhi.
Woh nazar-e-rehmat jo Aqa (PBUH) ki aankhon se jhalaki, aaj bhi iman walon ke quloob ko munawwar kar rahi hai aur ta qayamat hidayat o ulfat ka minar ban kar jagmagati rahegi.
Nigah-e-rehmat ke sarapaye noor ki sana mein qalam ki bisaat hi kya…
Khak-e-paye Mustafa
Muhammad Shahid Rahmani