🖋️Bint-e-Abul Khair Azmi
Zara ek lamhay ke liye aankhen band kijiye
Sochiye ke aaj sooraj ki yeh roshni aap ki zindagi ki aakhri roshni ho.
Yeh shaam aap ki umar ki aakhri shaam ho. Yeh saans jo is waqt chal rahi hai, yahi aakhri saans ho. Phir dil ki kaifiyat kya hogi? Zubaan par kaun se alfaaz aayenge? Aur sab se badh kar yeh ke hamare aamaal ki haqeeqat hamare samne kis soorat mein khadi hogi?
Zindagi, jise hum nihayat sanjeedgi se lete bhi hain aur ghair sanjeedgi se guzaarte bhi hain, darasal chand saanson ki amaanat hai. Hum subah se shaam tak mansoobe banate hain, khwaab sajaate hain, khwahishon ke mahal taamir karte hain; magar maut ke liye koi mansooba nahi banate. Halanke haqeeqat yeh hai ke maut woh yaqeeni sach hai jis se koi inkaar mumkin nahi. Agar aaj hamara aakhri din ho to hamein sab se pehle kis cheez ki fikar hogi? Maal o daulat ki? Shohrat o naam ki? Ya un lamhaat ki jo hum ne ghaflat mein zaya kar diye?
Agar aaj aakhri din ho to shayad hamein apni namazon ki kami mehsoos ho, woh sajde yaad aayen jo hum ne taal diye the, woh Quran ke auraaq yaad aayen jo kholne ka irada to kiya magar waqt na nikala. Hamein woh dil aazari yaad aayegi jo kisi ke dil mein hamare sabab paida hui, woh sakht jumle yaad aayenge jo hum ne ghusse mein keh diye, woh rishte yaad aayenge jinhen ana ki deewar ne hum se door kar diya.
Insaan badi badi kamyabiyon ke khwaab dekhta hai, magar sab se badi kamyabi yeh hai ke Rabb-e-Kareem hum se raazi ho. Agar aaj aakhri din ho to kya hum itminan se keh sakte hain ke hamara Rab hum se khush hai? Kya hum ne apni zindagi ko us maqsad ke liye sirf kiya jis ke liye hamein paida kiya gaya? Ya hum duniya ki rangeeniyon mein aise kho gaye ke asal manzil hi nigahon se aujhal ho gayi?
Haqeeqat yeh hai ke maut ka tasawwur dil ko jhanjhod deta hai, magar yahi tasawwur insaan ko sanwaar bhi deta hai. Jo shakhs har din ko aakhri din samajh kar jeeta hai, us ke alfaaz narm hote hain, us ka rawaiya mutawazan hota hai, us ke faisle ba waqar hote hain. Woh kisi ka haq nahi maarta, kisi par zulm nahi karta, waqt ko zaya nahi karta; kyunke use maloom hota hai ke har lamha hisaab mein aane wala hai.
Agar aaj aakhri din ho to shayad hum apne walidain ke qadmon mein baith jayen, un ke haath choom len, un ki duayen le len. Shayad hum apne asatiza ka shukriya ada karen, apne shagirdon ko naseehat karen, apne bachon ko gale laga len. Shayad hum apne Rab ke huzoor khade hokar aansu bahayen aur kahein:
“Ya Allah! Kotahiyan hueen to maaf farma, laghzishen hueen to darguzar farma, nekiyan kam hain to apne fazl se poora farma.”
Zindagi ka asal husn yahi hai ke hamein har din ek naya mauqa milta hai. Har subah darasal elaan karti hai ke abhi waqt hai, abhi saans baqi hai, abhi tauba ka darwaza khula hai, abhi islaah ki raah mumkin hai. Sawaal yeh nahi ke aakhri din kab aayega; sawaal yeh hai ke hum aaj ko kaise guzaar rahe hain.
Kaash hum har raat apne aap se poohen: agar aaj aakhri din hota to kya mein mutmain hoti? Agar jawab nafi mein ho to samajh lijiye ke abhi waqt hai.
Niyat durust kijiye, aamaal sanwariye, dilon ko jodiye, Rab se talluq mazboot kijiye. Kyunke dana wohi hai jo maut se pehle maut ki tayyari kar le, aur kamyab wohi hai jo duniya se jaane se pehle apne Rab ko raazi kar le.
Pas ahd karen ke hum har din ko aakhri din samajh kar guzaren ge. Har namaz ko aakhri namaz samajh kar padhen ge, har dua ko aakhri dua samajh kar mangen ge, har mulaqat ko aakhri mulaqat samajh kar karen ge. Tab zindagi mein sanjeedgi bhi aayegi, khushoo bhi, ikhlaas bhi aur noor bhi.
Shayad hamara aaj waqai aakhri na ho
Magar yeh soch hamein aisa bana de ke jab aakhri din aaye to hum ghabrayen nahi, balke sukoon ke saath apne Rab ki taraf laut jayen.
Aur yahi asal kamyabi hai.
Sochiye ke aaj sooraj ki yeh roshni aap ki zindagi ki aakhri roshni ho.
Yeh shaam aap ki umar ki aakhri shaam ho. Yeh saans jo is waqt chal rahi hai, yahi aakhri saans ho. Phir dil ki kaifiyat kya hogi? Zubaan par kaun se alfaaz aayenge? Aur sab se badh kar yeh ke hamare aamaal ki haqeeqat hamare samne kis soorat mein khadi hogi?
Zindagi, jise hum nihayat sanjeedgi se lete bhi hain aur ghair sanjeedgi se guzaarte bhi hain, darasal chand saanson ki amaanat hai. Hum subah se shaam tak mansoobe banate hain, khwaab sajaate hain, khwahishon ke mahal taamir karte hain; magar maut ke liye koi mansooba nahi banate. Halanke haqeeqat yeh hai ke maut woh yaqeeni sach hai jis se koi inkaar mumkin nahi. Agar aaj hamara aakhri din ho to hamein sab se pehle kis cheez ki fikar hogi? Maal o daulat ki? Shohrat o naam ki? Ya un lamhaat ki jo hum ne ghaflat mein zaya kar diye?
Agar aaj aakhri din ho to shayad hamein apni namazon ki kami mehsoos ho, woh sajde yaad aayen jo hum ne taal diye the, woh Quran ke auraaq yaad aayen jo kholne ka irada to kiya magar waqt na nikala. Hamein woh dil aazari yaad aayegi jo kisi ke dil mein hamare sabab paida hui, woh sakht jumle yaad aayenge jo hum ne ghusse mein keh diye, woh rishte yaad aayenge jinhen ana ki deewar ne hum se door kar diya.
Insaan badi badi kamyabiyon ke khwaab dekhta hai, magar sab se badi kamyabi yeh hai ke Rabb-e-Kareem hum se raazi ho. Agar aaj aakhri din ho to kya hum itminan se keh sakte hain ke hamara Rab hum se khush hai? Kya hum ne apni zindagi ko us maqsad ke liye sirf kiya jis ke liye hamein paida kiya gaya? Ya hum duniya ki rangeeniyon mein aise kho gaye ke asal manzil hi nigahon se aujhal ho gayi?
Haqeeqat yeh hai ke maut ka tasawwur dil ko jhanjhod deta hai, magar yahi tasawwur insaan ko sanwaar bhi deta hai. Jo shakhs har din ko aakhri din samajh kar jeeta hai, us ke alfaaz narm hote hain, us ka rawaiya mutawazan hota hai, us ke faisle ba waqar hote hain. Woh kisi ka haq nahi maarta, kisi par zulm nahi karta, waqt ko zaya nahi karta; kyunke use maloom hota hai ke har lamha hisaab mein aane wala hai.
Agar aaj aakhri din ho to shayad hum apne walidain ke qadmon mein baith jayen, un ke haath choom len, un ki duayen le len. Shayad hum apne asatiza ka shukriya ada karen, apne shagirdon ko naseehat karen, apne bachon ko gale laga len. Shayad hum apne Rab ke huzoor khade hokar aansu bahayen aur kahein:
“Ya Allah! Kotahiyan hueen to maaf farma, laghzishen hueen to darguzar farma, nekiyan kam hain to apne fazl se poora farma.”
Zindagi ka asal husn yahi hai ke hamein har din ek naya mauqa milta hai. Har subah darasal elaan karti hai ke abhi waqt hai, abhi saans baqi hai, abhi tauba ka darwaza khula hai, abhi islaah ki raah mumkin hai. Sawaal yeh nahi ke aakhri din kab aayega; sawaal yeh hai ke hum aaj ko kaise guzaar rahe hain.
Kaash hum har raat apne aap se poohen: agar aaj aakhri din hota to kya mein mutmain hoti? Agar jawab nafi mein ho to samajh lijiye ke abhi waqt hai.
Niyat durust kijiye, aamaal sanwariye, dilon ko jodiye, Rab se talluq mazboot kijiye. Kyunke dana wohi hai jo maut se pehle maut ki tayyari kar le, aur kamyab wohi hai jo duniya se jaane se pehle apne Rab ko raazi kar le.
Pas ahd karen ke hum har din ko aakhri din samajh kar guzaren ge. Har namaz ko aakhri namaz samajh kar padhen ge, har dua ko aakhri dua samajh kar mangen ge, har mulaqat ko aakhri mulaqat samajh kar karen ge. Tab zindagi mein sanjeedgi bhi aayegi, khushoo bhi, ikhlaas bhi aur noor bhi.
Shayad hamara aaj waqai aakhri na ho
Magar yeh soch hamein aisa bana de ke jab aakhri din aaye to hum ghabrayen nahi, balke sukoon ke saath apne Rab ki taraf laut jayen.
Aur yahi asal kamyabi hai.