Tehreer: Muhammad Masood Rahmani Arriyavi
Aaj hamare muashre mein "shaadi" ek mubarak taqreeb ke bajaye ek majboor baap ki bebasi ka tamasha ban chuki hai. Hum jis beti ko Allah ki rehmat kehte hain, usi ki rukhsati ke din hum ne insaniyat aur ghairat ko dafan karne ka aisa riwaj nikal liya hai ke sun kar hi rooh kaanp jati hai.
Kitni badi beghairati hai ke dulha 40 se 50 gaadiyon ka lashkar le kar ladki wale ke ghar par is shaan se chadhai karta hai jaise koi fatah hasil karne nikla ho. Almiya to yeh hai ke in gaadiyon ka petrol, in ka kiraya aur in ke driveron ka kharcha bhi usi "majboor baap" ki jeb se niklwaiya jata hai jis ne apni beti aap ke hawale kar di. Yeh gaadiyon ki qataren sadak par nahi, balkay us budhe baap ke seene par chalti hain jis ne apni umar bhar ki kamai in "rasmi dakoo'n" ki nazar kar di.
400 Baraati aur Zameer ki Maut:
Jis shakhs ke ghar bin bulaye do mehman aa jayen, use woh mehman pahar maloom hone lagte hain aur ghar ka budget hil jata hai, wohi shakhs jab dulha banta hai to 400 se 500 baratiyon ka hujoom le kar ladki wale ke darwaze par ja dhamakta hai. Kya is waqt use sharm nahi aati? Kya is ka zameer nahi jagta ke woh ghareeb baap kis tarah, kin qarzoon ke bojh tale dab kar in 500 peton ki aag bujhaye ga? Yeh ziyafat nahi, yeh us khandan ki khudari ka sauda hai.
Behissi ki inteha to tab hoti hai jab in 500 logon mein se kisi ek ko bhi booti chhoti mil jaye ya thanda pani na mile, to wahan ek hungama mach jata hai. "Hamari beizzati ho gayi", "intezam acha nahi tha"— yeh woh jumle hain jo us baap ke dil ko chalni kar dete hain jis ne apna jigar ka tukda tumhare hawale kar diya magar tum ek plate salan par sharafat ka libada utar phenkte ho. Tum khana khane nahi, balkay ek shareef insan ki tazleel karne jate ho.
Mardangi ya Safaid Posh Bheek?
Woh log jo khud ko nawab aur moaziz kehlwate hain, woh apni baraat ka khana apne ghar par kyun nahi khilate? Ladki wale ke ghar ja kar 500 logon ka pet bharna mardangi nahi balkay ek aisi "safaid posh bheek" hai jis par jitna matam kiya jaye kam hai. Hum sunnat-e-Rasool ﷺ ka naam to lete hain, lekin hamara amal jahiliyat ke badtareen daur se bhi badtar hai.
Faisla Kijiye!
Ae muashre ke thekedaro! Agar aaj hum ne in khooni rasmoon ke khilaf aawaz buland na ki, to yaad rakho ke yeh qarz ki qisten aur yeh samaji dehshat gardi hamari naslon ko nigal jayegi. Baraat ke naam par lashkar le jana band karo aur beti wale ko jeete ji dafan karna chhod do.
Aik Dardmandana Appeal
Mazmoon ke aakhir mein, mein apne tamam bhaiyon aur buzurgon se ek baat arz karna chahta hoon. Zara thande dil se sochiye! Ek waqt ka khana kha lena ya kisi ko khila dena koi badi baat nahi hai, ek aam insan bhi khushi khushi ek do mehmanon ki khidmat kar leta hai. Lekin jab back waqt 400 ya 500 afrad ka bojh ek hi akele insan ke kandhon par dal diya jaye, to us ke liye yeh "pahar" ban jata hai.
Woh baap jo pehle hi apni beti ki judai ke sadme mein nidhal hai, woh in saikdon logon ke akhrajat, gaadiyon ke kirayon aur khanon ki farmaishon ke neeche dab kar mar jata hai. Kya hamara zameer hamein malamat nahi karta ke hum apni ek shaam ki lazzat ke liye kisi ki poori zindagi ki jama punji harap kar jayen?
Lehaza! Meri aajizana guzarish hai ke in jahilana rasmoon aur baraton ke lashkar se parhez karen. Shaadi ko sunnat ke mutabiq saada banayen, taake beti wale ki safaid poshi ka bharam bhi reh jaye aur aap ke dastarkhwan par padne wala har luqma kisi ki aah ke bajaye dua ban kar aap ke pet mein jaye.