"The School Wall: Where Freedom Was Found, But the Heart Remained Imprisoned There"

Jise qaid khana samajh kar guzari thi barson, aaj usi qaid khane se mohabbat ho gayi

Shair

Ajab kashish thi aseer-e-qafas ki qismat mein

Rihai mil gayi lekin udaas baitha hun

Tamheed:

Insani fitrat hai ke woh azadi pasand karta hai aur jab use kisi nazm o zabt ya zabte mein bandha jata hai, to use woh deewarein qaid khana nazar aane lagti hain. Aaj se chand saal pehle jab mein is madrase ki chahar diwari mein dakhil hua tha, to yahan ki pabandiyan, subah sawere bedar hona, takrar ki ghantiyan aur asatza ki sakhtiyan mujhe ek qaid ki manind lagti theen. Lekin aaj jab yahan se rukhsat hone ka waqt aaya hai, to dil khoon ke ansoo ro raha hai aur ehsas ho raha hai ke jise mein qaid khana samajhta tha, woh darasal meri zindagi ka sab se mehfooz aur noorani thikana tha.

Pabandiyon mein chupi mohabbat:

Madrase ka woh makhsoos nizam, waqt par dastarkhwan par baithna, asbaq ki yaad dehani aur raat gaye tak mutala karna, shuru mein ek bojh mehsoos hota tha. Jee chahta tha ke kab yahan se niklein aur azad dunya ki rangeeniyon mein kho jayein. Magar aaj yeh haqeeqat khul kar samne aayi hai ke woh "qaid" darasal hamein zamane ke fitnon se bachane ke liye ek dhaal thi. Asatza ki woh daant dapt jise hum sakhti samajhte the, woh hamare kirdar ko tarashne ke liye ek sunar ki chot thi.

Is "qaid khane" ke sathiyon ke sath hansna, ek hi thali mein khana, raaton ko chup kar batein karna aur imtehan ki tayyari mein ek dusre ki madad karna— yeh woh zanjeerein theen jinhon ne hamein ek dusre ke dilon se bandh diya tha. Aaj madrase ka har gosha, woh masjid ka sehan, woh dar ul mutala ki mezein aur woh purani kitabein mujh se sawal kar rahi hain ke "kya waqai tum is qaid se azad hona chahte the?"

Aaj jab samaan bandh liya hai aur wapsi ka safar samne hai, to dunya ki woh azadi ek khaufnak jungle maloom ho rahi hai. Ab ehsas ho raha hai ke bahar ki dunya mein nafs ki ghulami hai, jabke is "qaid khane" mein Rab ki bandagi aur sukoon tha. Yahan ki har pabandi mein ek mithas thi aur har hukm mein ek sabaq.

Sach to yeh hai ke jis jagah ne hamein insan banaya, jahan hum ne Quran o Hadees ki roshni payi, woh jagah qaid khana nahi balkeh jannat ka ek tukda thi. Aaj dil pukar pukar kar keh raha hai ke ae kaash! mein isi qaid mein hamesha ke liye reh jata. Yeh judai nahi balkeh ek ehd hai ke yahan se jo noor hum ne hasil kiya hai, use puri dunya mein phailayenge, magar is "haseen qaid khane" ki yaadein hamesha hamare dilon mein abad raheingi.

Bichad kar tujh se ab jayein kahan ae darsgah-e-jaan!

Teri deewar o dar mein aaj apni zindagi chodi

Az ✍️ Muhammad Masood Rahmani Arariavi