Bazm-e-Sahafat, Talaba-e-Ilaqa-e-Mewat Mazahir Uloom (Waqf) Saharanpur ke Mah Nama "Al-Tableegh" ki Rudad

(Qist-e-Haftam)

Sahafati Ijlas se Pehle Chand Din

Rajab Al-Murajjab ki Panch Tareekh thi, Juma ka din tha, Maqalat Taqreeban Jama hone shuru ho gaye the, Aaghaz-e-Saal se hi ek Sahafati Inaami Ijlas ka Khayal bandhe hue tha, har Aaye din yeh Khayal jahan Shiddat pakadta ja raha tha to wahin dusri taraf yeh Mushkil aur Pareshani bhi lahiq thi ke Inaamat ka Intezaam kahan se aur kaise hoga? Jab ke Soorat-e-Haal yeh thi ke is se chand din qabl to mein dil hi dil mein yeh soch raha tha ke shayad yeh Inaami Program ka Khwab sirf Khwab hi reh jayega, Haqeeqat ka Jama pehnana ise Naseeb nahi hoga, magar Allah Taala ke Fazl-o-Karam se is Khayal ko Haqeeqat mein tabdeel karne ki Rahein nazar si aane lagi aur bas dil hi dil mein roz ba roz yeh Khayal Taraqqi karta chala gaya, yahan tak ke Panch Rajab Al-Murajjab ba roz Juma baad Namaz-e-Isha mein Mufti Nasiruddin Mazahiri Damat Barkatuhum Al-Aaliya ki Khidmat mein Hazir hua aur Sahafati Inaami Program ke Mukammal Khaka se unhen Mutla kiya, Mufti Sahib sun kar Khush hue, Aasani ki Duaen di, Mufeed Mashwaron se Nawaza, Mazeed Rehnumai bhi farmai.

Daftar-e-Ehtemam mein Darkhwast

Agle Roz yani 6/ Rajab Al-Murajjab ba roz hafta baad Namaz-e-Zuhr mein ne Nazim-e-Aala Mazahir Uloom Waqf Saharanpur Hazrat Maulana Mufti Muhammad Badran Saeedi Damat Barkatuhum Al-Aaliya ki Khidmat-e-Aqdas mein Sahafati Inaam Ijlas se Mutalliq ek Darkhwast likh kar pesh kar di.

Darkhwast ka Matan:

Makhdoomi wa Mukarrami Janab Hazrat Nazim Sahib Damat Barkatuhum Al-Aaliya

Assalamu Alaikum Wa Rahmatullahi Wa Barakatuhu

Baad Salam-e-Masnoon: Hazrat-e-Aqdas ki Khidmat mein Muaddibana Arz hai ke Alhamdulillah hum ko aap ke Karam-o-Ehsaan ke Tufail apni Tehreeron ko Nikharnay aur Jadariya nikalne ka Mauqa Naseeb hua, is par hum Talaba-e-Mewat aap ke Nihayat Ehsaan Mand aur Shukar Guzar hain.

Ab hum un tamam Dost wa Ahbab ki Hausla Afzai ke liye jinhon ne pure saal Mazameen-o-Maqalat likhe hain, ek Mukhtasar sa Inaami Program Aainda Jumerat (11/ Rajab Al-Murajjab 1447 Hijri. Mutabiq Yakam January 2026) ko Mun'aqid karna chahte hain, Aan Janab ki Karam Farmayi ke baais humen Yaqeen-e-Kamil hai ke humen is ki Ijazat de di jayegi.

Faqat Wassalam

Min Janib: Talaba-e-Ilaqa-e-Mewat

Mazahir Uloom Waqf Saharanpur

6/Rajab Al-Murajjab 1447 Hijri

Darkhwast padh kar Hazrat Nazim Sahib ne maloom kiya ke kis ki Nigrani mein karoge ? To mein ne kaha ke ji Mufti Nasiruddin Mazahiri ki Zair-e-Nigrani aur aap ki Zair-e-Sarparasti, Nazim Sahib ne Darkhwast par likh diya "Mufti Nasiruddin Sahib ki Nigrani mein Ijazat hai" aur yun Alhamdulillah Sahafati Inaami Ijlas ka pehla Marhala bakhubi Takmeel ko pahunch gaya.

Lage hath mein ne Nazim Sahib se yeh bhi keh diya ke ji agar aap ki taraf se Tulba ke liye bator Inaam kuch Kitaben Inayat ho jayen to aap ka bahut Ehsaan hoga, Hazrat Nazim Sahib ne farmaya: dekh len ge, do teen din pehle mujhe yaad dila dena, mein ne Hazrat Nazim Sahib ka Shukriya Ada karte hue wapsi ki rah li.

Muhtaj-e-Dua: Abdullah Yusuf

Rajab Al-Murajjab 1447 Hijri.

Wast-e-January 2026.