Rishta ek anmol tohfa hai
Khak-e-paye shuma: Muhammad Masoom Arriyavi
Darul Uloom Waqf Deoband
_________________________________
Rishte insan ki zindagi ki sabse qeemti daulat hote hain, magar afsos ke hum aksar in ki qadar us waqt samajhte hain jab yeh hath se nikalne ke qareeb ho jate hain. Quran-e-Kareem humen yaad dilata hai:
﴿وَاعْتَصِمُوا بِحَبْلِ اللّٰهِ جَمِيعًا وَلَا تَفَرَّقُوا﴾
(Allah ki rassi ko mazbooti se tham lo aur tafriqa mein na pado)
Hum zara si baat par rooth jate hain, aur phir ana ki ek nadeeda deewar hamare aur apnon ke darmiyan khadi ho jati hai. Ghusse mein kahe gaye chand be-soche samjhe alfaaz na sirf dilon ko zakhmi kar dete hain balkeh mohabbat ke anmol rishton ko deemak ki tarah aahista aahista kha jate hain. Hum is khaam khayal mein waqt zaya karte rehte hain ke agar hum waqai aham hain to doosra khud manane aayega, halanke mohabbat pehal ki mohtaj nahi hoti, woh to qurbani aur isar mangti hai.
Yeh ana hi to hai jo rishton ko tod deti hai
Warna mohabbat to jhukne ka hunar jaanti hai
Sahib! Narazgi ek aisi aag hai jo agar dilon mein sulagti rahe to mohabbat ke narm aur nazuk jazbaat us ki tapish mein jal kar raakh ho jate hain. Ibtida mein doori sirf ek mamooli sa waqfa mahsus hoti hai, magar waqt ke saath yahi waqfa itna badh jata hai ke wapsi ke raste dhundla jate hain. Shikwe, shikayaten aur gile jab had se badh jayen to woh zanjeeron ki shakal ikhtiyar kar lete hain, aur insan rishton ki khoobsurti mahsus karne se bhi mahroom ho jata hai.
Quran humen husn-e-akhlaq ki taleem deta hai:
﴿وَقُولُوا لِلنَّاسِ حُسْنًا﴾
(Logon se achi baat kaho)
Insan ki fitrat hai ke jab usse yeh ehsas hone lage ke samne wala us ki qadar nahi karta, us ki izzat nahi karta, bad zubani aur badtameezi ko mamool bana leta hai, to woh bhi aahista aahista apne dil ke darwaze band kar deta hai. Yun mohabbaton ke chirag bujhne lagte hain, aur rishte mahaz naam ke reh jate hain.
Lafz agar zeher ban jayen to rishte mar jate hain
Khamoshi bhi kabhi kabhi bada zulm ho jati hai
Zindagi ka asal husn rishton hi mein posheeda hai, maa baap, behan bhai, miyan biwi aur deegar aziz o aqarib. Yeh rishte woh aaina hain jin mein hum apni zaat ka asal chehra dekhte hain. Agar hum ana ke khol se bahar nikal kar ek qadam aage badha len to bohat se bikhartay hue talluqat ko bachaya ja sakta hai. Jhuk jana kamzori nahi, aur maafi mangna izzat ghatne ki alamat nahi, balkeh yeh mohabbat ki sabse badi taqat hai. Rasool-e-Akram ﷺ ka irshad hai ke maaf karne se insan ki izzat hi badhti hai.
Waqt kisi ke liye nahi rukta. Agar aaj hum ne apne rishton ko sanbhalne ki koshish na ki to kal shayad yeh sirf yaadon ka hissa ban kar reh jayen. Is se pehle ke bohat der ho jaye, apni narazgiyon ko mita dijiye, gile shikwe khatam kar dijiye, aur un mohabbaton ko phir se zinda kijiye jo dam todne ke qareeb hain. Kyunki mohabbat woh khazana hai jis ki khushbu zindagi ko haqeeqi lutf aur maanaviyat ata karti hai.
Khoobsurat rishte saath hon to zindagi jannat hai
Warna yeh duniya bhi ek veeran sehra se kam nahi.