*Kya hota hai khauf-e-Khuda*
Manqool General Knowledge,
Shumali Korea ke 73% log kisi mazhab ko nahi mante,
13% Chondo mat ke pairukar hain,
12% Shaman mat ke pairukar hain,
1.5% Budh mat ke pairukar hain,
jabke 0.5% deegar mazahab se talluq rakhte hain,
unhen Islam ke bare mein koi ilm nahi,
Aik Musalman sayyah wahan gaya aur aik maqami shehri se dosti ho gayi, Ramzan ka mahina tha,
jab us shehri ne apne Musalman dost ko khane ki dawat di to us ne kaha:
Main roze se hun, main ghuroob-e-aaftab se pehle kuch nahi kha sakta...
Korean shakhs ne pucha roza kya hota hai?
Musalman ne jawab diya roza tuloo-e-aaftab se ghuroob-e-aaftab tak kuch na khane peene ka naam hai,
yeh Allah Rabb-ul-izzat ne hum Musalmano ko ata farmaya hai hum Allah ke liye roza rakhte hain bhooka rehte hain iski ibadat karte hain aur is ka khauf apne dil o dimagh mein rakhte hain.
Korean bola tum chaho to chhup kar kha sakte ho, koi aapko nahi dekhe ga na mere ghar wala na koi aur,
Musalman ne kaha chahe koi dekhe ya na dekhe, Allah dekh raha hota hai aur woh saza de ga, aur yeh Allah ka hukm hai ke roze rakh liya to kuch nahi kha sakte na chhup kar na khule mein balke aik muddat tak isi haal mein rehna hoga, woh dost tha israr kar raha tha bar bar khane ka aur usko maloom nahi tha ke roza kya hai kis ko kehte hain aur kyun rakha jata hai...jab us ne Musalman ki baat suni aur maloom hua ke Allah ke khauf se bhook, pyas, sab ko chhod dete hain,
yeh sun kar Korean shakhs hairat se kehne laga:
To goya tum apne mulk mein bhi Allah ke dar se chhup kar kuch ghalat nahi karte goya woh yeh kehna chahta tha aap log har burai se pak hon ge kuch bhi ulta seedha nahi karte hon ge...
jaise us ne bayan kiya
to phir tumhare mulk mein
koi jail nahi hogi,
koi corruption nahi,
khane mein milawat nahi,
koi gandagi nahi,
koi black marketing nahi,
bachon ke sath ziyadti nahi,
koi rape nahi,
traffic qawanin ki khilaf warzi nahi,
koi chor nahi,
koi munafiqat nahi,
jaali dawaiyan nahi,
koi dhoka baz nahi,
koi jhoot nahi,
koi jurm nahi,
koi ghair ikhlaqi sargarmiyan nahi,
koi walidain ka na farman nahi,
koi kisi ko marne dantne wala nahi,
sirf aur sirf aman hi aman hoga,
kyunke aik aisa mulk jahan log mahaz Allah ke khauf se chhup kar bhi khane se gurez karte hain, wahan to koi jurm ho hi nahi sakta, wahan log kaise kisi ko takleef de sakte hain, bura bhala keh sakte hain, aur jab aik khane aur peene jaisi zaroorat se ruk sakta hai to goya woh har bure kaam se ruk sakta hai....
Korean ankhon mein ansu lekar bola bhai kya?
aap mujhe wahan le ja sakte hain, jahan itna acha sukoon ho, itna acha intezam ho, ke ghalat kaam se pehle us se darein jo ke tanhai mein bhi dekh leta hai aur khauf aisa ke bhook aur pyas jaisi cheez se ruk jaye jis ke liye kitne jatan karta hai insan, bhai hamare mulk mein to baat baat par ladai hoti hai, takleef di jati hai, aur koi khana peena band nahi karta, chori, gheebat, bura bhala, zina, jhoot, dagha khayanat, zulm, jehl, hasad o kina, qatal o gharat, yeh sab batein to aam hain...
Us ne ghaur kiya aur kuch lamhe soch kar us ne Musalman se kaha bhai le jao ge?
Jawab diya bhai kaise le jaon aap aik kaam karo Musalman ho jao phir aap bhi darna,
Woh bola bhai kya baat keh rahe ho main yahan reh kar bhi dar sakta hun? Musalman ne kaha ji bhai.
Phir bola bhai kaise?
Us ne kaha aapko Allah ko aik manna hoga bola theek hai manta hun.
Yun samjhiye us ne use kalma padhaya aur Musalman kar diya phir sab batein use sikhai aur Alhamdulillah woh Musalman ho gaya aur un tamam baton ko us ne chhod diya jo khurafat woh kiya karta tha...
Yaqeenan yahi hai Islam ki haqeeqat, yahi hai Islam ka shiar, yahi hai Islam ki taleem, lekin afsos sad afsos, ke isko roza to samjha diya gaya lekin ab Musalman kis se darte hain aur Allah se kitna darte hain main bayan nahi kar sakta, Allah Kareem Musalmano ko khoya hua waqar lauta de...
Jab main isko padh kar likh raha tha tab mere aik aziz mere pas aye aur bole iska to abhi mauqa bhi nahi hai likh lo Ramzan ke waqt nashr kar dena main ne bhai pata nahi phir yaad raha ya na raha aur main ne likh diya, asal maqsad khauf-e-Khuda ko bayan karna hai, woh is se mein nazar aa raha hai kabhi kabhi cheezein khilaf mauqa mahal nasihatan rakh di jati hain...
Mahasil
Khuda qasam is bande ne bayan kar diya ke dar kis ko kehte hain aur khauf-e-Khuda kya hota lekin yeh sab rasm hain ab to roza rakh kar log namaz bhi nahi padhte, kash khauf-e-Khuda hamare dilon mein hota, hamare wujood mein hota, hamari tanhai mein hota, ya Allah tu hamein apna khauf ata farma Ameen bijah al-Nabi al-Kareem ﷺ.....
Haqeeqatan ankhen khol dene wali baat hai hum tamam Musalmano ki aur sabaq hasil karna chahiye, Allah Kareem hamari hifazat farmaye Ameen Ya Rabb-ul-aalameen...
Talib-e-dua-e-khair Muhammad Muzammil
✍️ Mutallim al-Jamia al-Ashrafia✍️