🖋️Bint-e-Abul Khair Azmi
Woh rasta jo shor-e-duniya mein gum ho gaya tha,
Woh simt jo khwahishat ke hujoom mein aujhal ho chuki thi,
Woh darwaza jis ke bare mein mein ne khud ko yeh bawar kara liya tha ke shayad ab band ho chuka hai.
Yeh wapsi kisi aik lamhe ki paidaar nahi thi yeh dil ki thakan, rooh ki pyas aur zameer ki beqarari ka haasil thi. Bohat door nikal aayi thi mein itna door ke apne hi saye se ajnabi ho gai thi.
Hansi honton par thi magar dil mein veerani,
Zuban par baten thin magar aankhon mein sawal,
Hathon mein masroofiyat thi magar seene mein khala.
Mein chalti rahi, doudti rahi, aur samajhti rahi ke shayad yehi zindagi hai magar haqeeqat yeh thi ke mein khud se bhag rahi thi.
Phir aik din… ya shayad aik raat jab khamoshi had se barh gai
Dil ne himmat ki. Us ne shor ko aik taraf rakha aur sach ko pukara.
Usi lamhe mujhe ehsas hua ke wapsi ka rasta kabhi gum nahi hota; hum khud apni aankhon par parda daal lete hain.
Rab ka darwaza band nahi hota, band to hamari samaat ho jati hai.
Woh pukar aaj bhi wohi thi: “Aa jao… mein qareeb hun” farq sirf itna tha ke ab mein sunne lagi thi.
Mein ne samajh liya ke wapsi ke liye paron ki nahi, nadamat ki zaroorat hoti hai.
Raftaar ki nahi, sachai ki zaroorat hoti hai.
Daawon ki nahi, aik sajde ki zaroorat hoti hai.
Mein ne jaan liya ke Rab ke huzoor pahunchne ke liye raste lambe nahi hote, dil jhukana padta hai.
Gunah bade sahi, magar rehmat us se kahin badi
Andhere gehre sahi, magar fajar ka wada sacha.
Wapsi ke is safar mein sab se pehle ghuroor toota aur us ke tootate hi bojh halka ho gaya.
Phir bahane gire aur aankhen saaf ho gain.
Us ke baad aansu bahe aur dil dhul gaya.
Mein ne pehli baar jana ke nadamat kamzori nahi, quwat hai.
Aur rujoo shikast nahi, nijaat hai.
Rab ko hamari sachai pasand hai.
Woh palat aane wale dil qubool karta hai.
Mein jab dehleez-e-rehmat par pahunchi to na koi taana tha, na koi sawal
Bus qubooliyat ki khamosh muskurahat thi.
Yun laga jaise kaha ja raha ho: “Mein to yahin tha, tum hi der se aayi”.
Us lamhe mujhe yaqeen ho gaya ke wapsi ka rasta hamesha roshan rehta hai.
Yeh chiragh Rab khud jalata hai, shart sirf yeh hai ke hum andhere se dil na lagayen.
Ab mein jaanti hun: girna insaniyat hai, magar gire rehna mehroomi.
Laut aana izzat hai, aur lautane wala Rab Kareem hai.
Mein ne wapsi ka rasta dhond liya aur is raste par sukoon hai, umeed hai, aur woh qurb hai jo dilon ko zinda kar deta hai.
Agar koi pooche ke yeh rasta kahan se shuru hota hai to mein muskura kar kahun gi:
Aik sachi aah se, aik toote dil se, aur aik jhuke hue sajde se.