Bint-e-Abul Khair Azmi
Kabhi kabhi zindagi ke hangamon mein, shor, hujoom aur masroofiyat ke beech ek lamha aisa aata hai jab dil ki sarhad par koi khamosh si dastak hoti hai.
Na woh aawaz kanon se suni jaati hai, na aankhon se dekhi jaati hai; magar rooh ise poori tarah mehsoos kar leti hai.
Yeh Rab ki dastak hoti hai woh Rab jo bande se door nahi, magar banda khud apne Rab se door ho jata hai.
Yeh dastak us waqt sunai deti hai jab dil thak jata hai, umeedein bojh banne lagti hain, aur duniya ki chamak damak aankhon ko kheera karne ke bawajood rooh ko tareek chhod deti hai.
Tab ehsas hota hai ke asal khala kisi cheez ka nahi, balki kisi zaat ka hai.
Woh zaat jis ke baghair dil ka koi gosha aabad nahi ho sakta.
Dil ek sarhad hai ek aisi had jahan duniya khatam hoti hai aur aakhirat ki jhalak shuru hoti hai.
Yahi woh maqam hai jahan khwahishat aur hidayat aamne samne khadi hoti hain.
Rab ki dastak isi sarhad par hoti hai, jaise woh bande se keh raha hai:
“Ab bhi laut aao, darwaza band nahi hua.”
Rab ki yeh pukar kabhi aazmaish ki soorat mein aati hai, kabhi kisi nemat ke chhin jaane mein, aur kabhi kisi aayat, kisi naseehat ya kisi sajde ke aansuon mein dhal jaati hai.
Ghaflat yeh hai ke hum dil ke darwaze par duniya ke itne taale laga lete hain ke is dastak ko sunne ki fursat hi nahi milti.
Jab insaan ruk kar khud se sawal karta hai mein kahan khada hoon?
Kis simt ja raha hoon?
Meri kamyabi ka miyar kya hai?
Tab yeh sawal darasal Rab ki dastak ka tarjuma hote hain.
Yahi lamha insaan ki zindagi ka sab se qeemti lamha ban sakta hai, agar woh is dastak par darwaza khol le.
Dil ka darwaza khulta hai to tauba ki khushboo phailti hai, aankhon mein nadamat utarti hai, aur sajde bojh nahi balki sukoon ban jaate hain.
Tab maloom hota hai ke Rab ki dastak to thamne aayi thi, sahara dene aayi thi, rasta dikhane aayi thi.
Dil ki sarhad par Rab ki dastak darasal mohabbat ki aakhri nahi, pehli sada hai.
Yeh elaan hai ke banda chahe jitna bhatak jaye, Rab ki rehmat us se pehle pahunch jaati hai.
Shart sirf itni hai ke banda ghuroor ke parde hata de aur aajzi se yeh keh de:
“Ae mere Rab! Mein aa gayi hoon.”
Jo is dastak ko pehchan leta hai, us ki zindagi ki simt badal jaati hai.
Woh duniya mein rehta hai magar duniya us ke dil mein nahi rehti.
Us ka dil Rab ke noor se roshan ho jata hai, aur yahi roshni ise andheron se nikal kar itminan ki shahrah par le aati hai.
Kash hum sun sakein…
Kash hum pehchan sakein…
To poori zindagi zaya na karte
Jazakum Allahu Khairan Katheera wa Ahsanal Jazaa fid Dunya wal Akhirah