🌻Sadqa-tul-Fitr ka Masraf (2)
[1] Sadqa-tul-Fitr apne usool (maan, baap, dada, dadi, nana, nani isi tarah upar tak) aur furoo (beta beti, pota poti aur nawasa nawasi isi tarah neeche tak) ko dena jaiz nahi hai.
[2] Biwi shohar ko aur shohar biwi ko apna Sadqa-tul-Fitr nahi de sakta.
[3] Bhai behan, bhatija bhatiji, bhanja bhanji, chachi, phupa phupi, khalu khala, mamu, mamani, susar, saas, sala, behnoi, sotela baap, soteli maan in sab rishtedaron ko Sadqa-tul-Fitr dena durust hai bashart yeh ghareeb aur mustahiq hon.
[4] Sadqa-tul-Fitr ghair Muslim ko dena jaiz nahi hai.
[5] Khandan Banu Hashim ko Sadqa-tul-Fitr dena jaiz nahi hai. Banu Hashim se murad woh log hain jo Hazrat Ali Razi Allahu Anhu, Hazrat Abbas Razi Allahu Anhu, Hazrat Jafar Razi Allahu Anhu, Hazrat Aqeel Razi Allahu Anhu aur Hazrat Haris bin Abdul Muttalib Razi Allahu Anhu ki aulad aur un ke nasab se talluq rakhte hon. Is liye in ki madad Sadqa-tul-Fitr ke ilawa deegar raqum se ki jaye.
[6] Agar mian biwi mein se koi ek Bani Hashim se ho aur dusra ghair Bani Hashim se ho to jo ghair Bani Hashim se ho us ko Sadqa-tul-Fitr di ja sakti hai. Agar baap Bani Hashim se ho to us ki aulad bhi Bani Hashim se shumar ho gi. Agar baap ghair Bani Hashim se ho, biwi Bani Hashim se ho to aulad ghair Bani Hashim shumar ho gi kyunke nasab mein baap ka aitibar hota hai, maan ka nahi.
[7] Agar ustad ghareeb hai aur nisab ka malik nahi hai to shagird ke liye ustad ko Sadqa-tul-Fitr dena jaiz hai balke mustahiq ustad ko Sadqa-tul-Fitr dene ka sawab ziyada mile ga.
[8] Mustahiq mulazmeen ko bator tankhwah Sadqa-tul-Fitr ki raqum dena jaiz nahi. Haan tankhwah ke unwan ke ilawa waise imdad ke taur par de di jaye to jaiz hai.
[9] Kai afraad ka Sadqa-tul-Fitr ek shakhs ko diya ja sakta hai. Isi tarah ek fard ka Sadqa-tul-Fitr bhi kai afraad ko diya ja sakta hai.
[10] Aisi NGOs aur idare jo shari hudood ka lihaz nahi karte, unhen Sadqa-tul-Fitr dena jaiz nahi.
Wallahu Aalam Bis-Sawab