*یاد رکھ میری قوم کی بیٹی*
*✍🏻 محمد پالن پوری*
یاد رکھ میری قوم کی گڈیا کہ تو جب ایک قدم غلط اٹھاتی ہے تو بربادی تیرے قدموں سے نہیں چلتی ایک باپ کی دھڑکن سے چلتی ہے، ایک ماں کی نیند سے چلتی ہے، ایک بھائی کے مان سے چلتی ہے۔۔ تُو سمجھتی ہے تُو اکیلی جا رہی ہے؟ نہیں گڈیا! تیرے پیچھے ایک خاندان کی پوری کی پوری امیدیں رو رہی ہوتی ہیں، ایک باپ کی ریڑھ کی ہڈی ٹوٹ رہی ہوتی ہے۔ تُو جس لمحے ہاتھ چھوڑ کر بھاگتی ہے اسی لمحے تیرے باپ کے ہاتھ کانپنے لگتے ہیں۔ جن ہاتھوں نے تجھے سہارا دیا وہ اچانک ہوا میں لٹک کر رہ جاتے ہیں۔ تُو سمجھتی ہے کہ محبت کے پیچھے جا رہی ہوں؟ نہیں میری گڈیا! تُو اپنے گھر کے سکون کو دفن کر کے جا رہی ہے، تُو اپنے والدین کے ارمانوں کی قبریں کھود کر جا رہی ہے۔۔۔۔۔
تُو وہ روشنی تھی جو گھر کی دیواروں پر صبحیں بناتی تھی مگر جب تُو بھاگتی ہے تو پوری نسل پر شامیں چھا جاتی ہیں۔یاد رکھ تُو ایک خاندان کی نسلوں کی عزت ہے، تُو اپنے باپ کی پیشانی کا وقار ہے، تُو اپنی ماں کی آنکھوں کا مستقبل ہے۔ تُو جب ٹھوکر کھا کر گرتی ہے تو گرتی تُو ہے مگر ٹوٹتے وہ سب ہیں جنہوں نے تجھے پالا تھا۔۔۔۔۔۔
اے میری قوم کی گڈیا! تیرے قدم کا غلط زاویہ صرف تیرے راستے کو نہیں بگاڑتا تیرے پیچھے کھڑے ان سب چہروں کی زندگی بگاڑ دیتا ہے جو تیرے لئے جیتے تھے، جو تیرے آنے کی آواز سے خوشی محسوس کرتے تھے۔۔ تُو اگر اندھی دوڑ میں لگ جائے تو جان لے کہ تیرے پیچھے وہ لوگ کھڑے ہوتے ہیں جن کی آنکھیں تیری ایک مسکراہٹ سے جنت دیکھتی تھیں۔ یاد رکھ! دنیا کی محبتیں دھوکہ دے سکتی ہیں مگر تیرے والدین کا دل تیرے بغیر نہیں جیتا۔ تُو اگر ایک لمحے میں ان کی امید توڑ دے تو وہ عمر بھر اس امید کے ملبے تلے دبے رہتے ہیں۔۔۔
میری گڈیا! سنبھل جا، پلٹ آ، یہ دنیا تیرے خواب دکھا کر نگل جائے گی لیکن تیرے والدین وہ چراغ ہیں جو تیرے بجھ جانے پر خود کو جلا دیتے ہیں، تُو اگر رک کر ایک لمحہ سوچ لے کہ تیرے پیچھے کون کون آنکھیں بچھائے کھڑا ہے تو تُو کبھی بربادی کے راستے کا رخ نہ کرے۔ یاد رکھ! تُو جیتی ہے تو سب جیتے ہیں، تُو ڈگمگاتی ہے تو سب کے قدم لرز جاتے ہیں، تُو سیدھی ہو جائے تو خاندان اُٹھ کھڑا ہوتا ہے، تُو ٹھیک فیصلہ کرے تو نسلیں محفوظ ہو جاتی ہیں۔۔
اے میری قوم کی بیٹی! ایک لمحہ رک، دل پر ہاتھ رکھ اور دیکھ کہ تیرے پیچھے کتنے دل کھڑے ہیں، کتنی دھڑکنیں منتظر ہیں، کتنی دعائیں تیری امان کے لئے آسمان پر دستک دے رہی ہیں۔۔۔ سنبھل جا۔۔ تیرے راستے میں روشنی بھی ہے مگر اندھیرا بھی گھات میں ہے۔ مگر روشنی صرف اس وقت تیری ہوتی ہے جب تُو اپنے آپ، اپنی عزت، اپنے گھر کا
دامن نہ چھوڑے۔۔۔۔۔۔۔۔
✍🏻 محمد پالن پوری