Bismillah hir Rahman nir Raheem
Assalam-o-Alaikum Wa Rahmatullahi Wa Barakatuhu
Waqia-e-Meraj-un-Nabi (Peace Be Upon Him) ka Saboot Ayaat Qurani Se:
Is waqia ki tareekh aur saal ke mutalliq, muarrikheen ki raaye mukhtalif hain, in mein se ek raaye yeh hai ke nabuwat ke barahwein saal 27 Rajab ko 51 saal 5 maheena ki umar mein Nabi Akram (Peace Be Upon Him) ko Meraj hui, jaisa ke Allama Qazi Muhammad Suleman Salman Mansoorpuri Rehmatullah Alaih ne apni kitaab "Mehr-e-Nabuwat" mein tehreer farmaya hai.
Israa ke maani raat ko le jaane ke hain. Masjid-e-Haram (Makkah Mukarrama) se Masjid-e-Aqsa ka safar jis ka tazkira Surah Bani Israel "Subhanallazi Asra bi abdihi lailam minal Masjidil Harami ilal Masjidil Aqsa" mein kiya gaya hai, is ko Israa kehte hain. Aur yahan se jo safar aasmanon ki taraf hua is ka naam Meraj hai.
"Meraj" urooj se nikla hai jis ke maani chadhne ke hain. Hadees mein "Urij bi" yani "mujh ko upar chadhaya gaya" ka lafz istemal hua hai, is liye is safar ka naam Meraj hogaya.
Is muqaddas waqia ko Israa aur Meraj dono naamon se yaad kiya jata hai. Is waqia ka zikr Surah Najm ki aayaat mein bhi hai:
"Phir woh qareeb aaya aur jhuk pada, yahan tak ke woh do kamanon ke faasle ke barabar qareeb aagaya, balki is se bhi zyada nazdeek, is tarah Allah ko apne bande par jo wahi nazil farmani thi, woh nazil farmai."
Surah Najm ki aayaat 13-18 mein wazahat hai ke Huzoor Akram (Peace Be Upon Him) ne (is mauqa par) badi badi nishaniyan mulahiza farmai:
"Aur haqeeqat yeh hai unhon ne is (farishte) ko ek aur martaba dekha hai. Is ber ke darakht ke paas jis ka naam Sidrat-ul-Muntaha hai, isi ke paas Jannat-ul-Mawa hai, is waqt is ber ke darakht par woh cheezein chhai hui theen jo bhi is par chhai hui theen. (Nabi ki) aankh na to chakrai aur na had se aage badhi, sach to yeh hai ke unhon ne apne Parwardigar ki badi badi nishaniyon mein se bahut kuch dekha hai."
Aur yeh waqia ahadees-e-mutawatirah se bhi sabit hai, yani Sahaba (RA), Tabieen (RA) aur Taba Tabieen (RA) ki ek badi tadaad se Meraj ke waqia se mutalliq ahadees marwi hain.
Insani tareekh ka sab se lamba safar
Quran Kareem aur ahadees-e-mutawatirah se sabit hai ke Israa wa Meraj ka tamam safar sirf roohani nahi, balki jismani tha, yani Nabi Akram (Peace Be Upon Him) ka yeh safar koi khwab nahi tha, balki ek jismani safar aur aini mushahida tha. Yeh ek mojza tha ke mukhtalif marahil se guzarkar itna bada safar Allah Taala ne apni qudrat se sirf raat ke ek hissa mein mukammal kardiya.
Wallahu Aalam bis Sawab
..
Assalam-o-Alaikum Wa Rahmatullahi Wa Barakatuhu