Soch Ki Shaam Muashray Ke Naam

Abhi zara fursat muyassar aayi, chai ka cup dast-e-giraft mein tha ke qalam khud bakhud ungliyon mein aa gaya. Zaviya-e-fikr be ikhtiyar Muslim muashray ki taraf mud gaya. Dil ne kaha ke is bigaar par kuch likha jaye jo aahista aahista hamari jaroon ko khokhla kar raha hai magar foran hi yeh sawal samnay aa khada hua ke aakhir kya likhoon aur kya chhod doon?

Yeh faisla meri aqal ke bas se bahar tha. Naujawanon ki be rah rawi qalam band karoon ya kam sin bachiyon ke fikri inhitat par nauha karoon? Hasad aur keenay ki bhatti mein sulagtay is muashray ko bachanay nikla to doosri simt maa baap dikhai diye jo apni jawan aulad ki nafarmaniyon ke hathon aankhon mein aansu liye khamosh khade thay. Abhi udhar se nazar hatti hi thi ke poorab ki janib bhai ko bhai se ladte, shor machate dekha. Saas bahu ki falak shigaaf aawazein kanon mein padeen. Deorani aur jethani ki zuban ko tu tu, mein mein aur napak jumlon se aaluda paya. Aik konay mein murjhaya hua chehra liye aik talaq yafta ladki ko dekha jis ka nikah chand hi mahinon mein toot chuka tha jo zuban-e-haal se keh rahi thi ba'i zambin turikat (kis gunah ke sabab mujhe chhod diya gaya). Chorahon par jawani ko daghdar hotay, ummat ke mustaqbil ko bikharte dekha. Nashay ki lat mein jakde ummat ke nau nehalon ko tadapte dekha. Abhi in khurafat ko mehsoos hi kar raha tha ke aik aur ehsas ne janam liya ke yeh to bas samnay ki deewarein theen aur in ke peechay andheray kamron mein aur bhi bohat kuch pal raha tha. Mein is tareeki ki aur badha, darwaza khola to dekha ke yahan to ibadat bhi muqabla ban gayi hai, dikhawa ikhlas par ghalib aa chuka hai aur neki ab Allah ki bajaye camera ke liye ki jati hai. Masjidein aabad dekhi magar dil ki duniya veeran nazar aayi, waaz sunte log dekhe magar amal ke liye kamar kas afraad ki bajaye kamar kash dekhe. Nazar zara aagay ki aur badhi to dekha ke ilm ki jagah maloomat ne le li hai. Har shakhs do videos dekh kar mufti, danishwar aur musleh ban baitha hai. Badon ka ehtaram purani soch qarar paya, ustad mehaz aik sarkari mulazim reh gaya. Dekha to jhoot kirdar mein utar aaya tha. Jaali muskurahatein, banawati talluqat aur mufad ke mutabiq badalte hue chehron ki bhi ziyarat hui.

Abhi dekh hi raha tha ke udhar se aawaz aayi mud kar dekha to halal o haram cheekh rahe thay ke likh is ko ke hamari lakeerein itni madham ho chuki hai ke kamai ki boo tak mehsoos nahi hoti. Sath mein rishta-e-azdwaj bhi khada tha woh bhi bol pada janab is ko bhi qalam band kar dein ke hamare mutalliq miyar taqwa nahi raha balkay package, tankhwah aur status ban chuka hain. Jahez ki maloon riwayat ko wajoob ka darja de diya hai........

Bas qalam kapkapane laga aur kehne laga bas kar itna sunte sunte meri siyahi khatam ho chuki. Mujh mein taqat nahi hai ke in sab ko qalam band karoon isliye nahi ke likh nahi sakta balkay isliye ke sach sunne ki ab himmat nahi rahi is ummat-e-Muhammadiya ko........